Muqdisho (Dawan)–Golaha Mustaqbalka Soomaaliyeed ee mucaaradka ah aayaa maanta oo Talaado ah ku eedeeyay Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, inuu hurinayo xiisadda ka taagan magaalada Gaalkacyo, isagoo ku andacooday in dowladda Federaalka ay halkaas u daadgureysay hub iyo ciidamo.
War-saxaafadeed uu goluhu soo saaray ayaa lagu sheegay in hubka iyo ciidamada la geeyay Gaalkacyo ay sababeen, sida uu goluhu ku dooday, xiisad colaadeed oo halis gelin karta nabadda, xasilloonida iyo wada noolaanshaha bulshada ku nool deegaannada Galmudug iyo Puntland.
Goluhu waxa uu sidoo kale ku eedeeyay madaxweynaha in tallaabooyinkaasi ay horseedi karaan colaad hor leh, xilli ay ciidamada dowladda Federaalka weli dagaal kula jirto Al-Shabaab.