Somalia, 9 Oktoobar 2025 — Boqollaal qof ayaa Jimcihii isugu soo baxay magaalada Muqdisho si ay u muujiyaan taageeradooda shacabka Falastiin kadib markii xabbad-joojin bani’aadantinimo ah lagu dhawaaqay marinka Gaza. Mudaharaadkan ayaa waxaa hogaaminayey qaar ka mid ah culimada Soomaaliyeed, waxaana dadku soo bandhigeen calanka Falastiin iyo sawirrada dadka ku geeriyooday colaadaha labada sano ee lasoo dhaafay.
Dowladda Federaalka Soomaaliya ayaa horay u soo dhaweeysay heshiiska xabbad-joojinta ee ka dhacay Sharm El-Sheikh, Masar, oo ay garwadeen ka ahaayeen Qadar, Turkiga, iyo Mareykanka. Sida ku cad bayaanka Wasaaradda Arrimaha Dibadda, “Soomaaliya waxay muujineysaa bogaadin qoto dheer oo ku aaddan dadaallada gobolka iyo caalamiga ah ee horseeday heshiiskan, kaas oo ku saleysan xabbad-joojin, fududeynta gaarsiinta gargaarka bani’aadantinimo, sii deynta maxaabiista, iyo dib u bilaabida wadahadalada siyaasadeed ee caalamiga ah.”
Bayaanka ayaa intaas ku daray in “Soomaaliya ay dib u xaqiijineyso taageerada ay u hayso xuquuqda sharciga ah ee shacabka Falastiin, gaar ahaan xaqa ay u leeyihiin in ay helaan dal madax-bannaan, taasoo ka tarjumeysa u hogaansanaanta Soomaaliya ee sharciyada caalamiga ah iyo qiyamka sharafta, caddaaladda, iyo wada noolaanshaha nabadda.”
Banaanbaxan Muqdisho ka dhacay ayaa ah mid ka mid ah dhowr isu soo bax oo ay shacabka Soomaaliyeed sameeyeen tan iyo sanadkii 2023 taa soo ay ku muujinayeen diidmada duqeymaha iyo cunaqabateynta bani’aadantinimo ee ka jirta Gaza.