Muqdisho (Dawan)- Magaalada Muqdisho ayaa martigelisay daahfurka xarun cusub oo diiradda saaraysa horumarinta teknoolojiyadda garaadka macmalka (AI) ee Af-Soomaaliga.
Xaruntan, oo ah tii ugu horreysay ee noocan ah ee laga hirgeliyo Soomaaliya, waxaa iska kaashaday Jaamacadda Jamhuuriya iyo Jaamacadda Jabuuti.
Guddoomiyaha Jaamacadda Jamhuuriya, Maxamed Axmed, ayaa sheegay in xaruntan ay si gaar ah uga shaqeyn doonto kobcinta xogta Af-Soomaaliga ee ay adeegsadaan nidaamyada garaadka macmalka ah, isla markaana ujeedadu tahay in luqadda Soomaaligu ay gaarto heer sare oo ay kaga mid noqoto luqadaha caalamiga ah ee dunida dijitaalka.
“Waxaan daahfurnay xarun si gaar ah uga shaqeyn doonta horumarinta Af-Soomaaliga ee teknoolojiyadda, si luqaddeennu u gaarto heer sare. Kobcinta xogta uu garaadka macmalka ahi ka hayo Af-Soomaaliga ayaa ah ujeeddadeenna,” ayuu yiri Maxamed Axmed.
Safiirka Jabuuti ee Soomaaliya, oo ka qayb galay munaasabadda, ayaa caddeeyay in dowladdiisu ay si weyn uga go’an tahay horumarinta Af-Soomaaliga. Wuxuu tilmaamay in Madaxweyne Ismaaciil Cumar Geelle uu mudnaan gaar ah siinayo horumarinta luqadda, isla markaana ay dowladdu maalgelisay hay’ado ay ka mid tahay Akademiyadda Af-Soomaaliga.
