Muqdisho (Dawan) – Soomaaliya iyo Masar ayaa magaalada Muqdisho ka furay aqoon-isweydaarsi farsamo oo ku saabsan istaraatiijiyadaha la-dagaallanka musuqmaasuqa, kaas oo qayb ka ah iskaashiga u dhexeeya Hay’adaha Hantidhowrka Guud ee labada dal.
Aqoon-isweydaarsiga oo billowday 13-ka Luulyo 2026, ayaa socon doona illaa 16-ka Luulyo 2026, waxaana ka qaybgalaya howl-wadeenno ka socda Xafiiska Hantidhowrka Guud ee Soomaaliya, Wasaaradda Cadaaladda iyo Arrimaha Dastuurka, Xafiiska Xeer Ilaaliyaha Guud ee Qaranka iyo Wasaaradda Maaliyadda. Tababarkan waxaa fulinaya qubaro ka socda Masar.
Agaasimaha Xiriirka ee Xafiiska Hantidhowrka Guud ee Soomaaliya, Maxamed Daahir, ayaa sheegay in ujeeddada tababarku ay tahay kor u qaadista awoodda xirfadeed ee ka qaybgalayaasha, is-dhaafsiga aqoonta iyo waaya-aragnimada, iyo fahamka qaab-dhismeedyada heer gobol iyo heer caalami ee la-dagaallanka musuqmaasuqa.
“Ujeedka tababarku waa kor u qaadista wacyiga ka qaybgalayaasha, is-dhaafsiga aqoonta iyo waaya-aragnimada, iyo fahamka qaab-dhismeedyada heer gobol iyo heer caalami ee la-dagaallanka musuqmaasuqa,” ayuu yiri Maxamed Daahir.
