Muqdisho oo lagu xusay sannad-guurada 77-aad ee aasaaska Jamhuuriyadda Shiinaha

Muqdisho (Dawan)– Magaalada Muqdisho ayaa shalay lagu qabtay munaasabad lagu xusay sannad-guurada 77-aad ee aasaaska Jamhuuriyadda Dadka Shiinaha, waxaana ka qeybgalay Wasiirka Gaashaandhigga Soomaaliya Axmed Macallin Fiqi, sida ay sheegtay Wasaaradda Gaashaandhigga Soomaaliya.

Fiqi oo khudbad ka jeediyay munaasabadda ayaa sheegay in Soomaaliya iyo Shiinaha uu ka dhexeeyo xiriir soo jireen ah oo ku dhisan ixtiraam, sinnaan iyo danaha labada dal, isagoo xusay in xiriirka labada dhinac sannadkii 2024 loo qaaday heer iskaashi istiraatiiji ah.

Wasiirka ayaa bogaadiyay mowqifka Shiinaha ee taageerada madaxbannaanida, midnimada iyo wadajirka dhuleed ee Soomaaliya, iyo taageerada Beijing ee dadaallada la xiriira nabadda, amniga iyo horumarka dalka.

Dowladda Soomaaliya ayaa rajeyneysa in iskaashiga labada dal la sii ballaariyo, gaar ahaan dhinacyada difaaca iyo amniga, horumarinta dhaqaalaha, kaabeyaasha dhaqaalaha iyo amniga badda, sida uu sheegay Fiqi.

Wasiirka ayaa sidoo kale sheegay in Muqdisho ay dooneyso in la xoojiyo xiriirka ka dhexeeya shacabka labada dal, isagoo Danjiraha Shiinaha ee Soomaaliya uga mahadceliyay dadaallada uu ku bixinayo horumarinta xiriirka labada dhinac.

Soomaaliya iyo Shiinaha ayaa sannadkii 2024 xiriirkooda u qaaday heer iskaashi istiraatiiji ah, iyadoo labada dowladood ay muujinayaan inay doonayaan ballaarinta iskaashiga dhinacyada siyaasadda, amniga iyo horumarinta dhaqaalaha.