Muqdisho (Dawan) – Siyaasiga mucaaradka ah ahna musharraxa madaxweynaha Soomaaliya, Cabdiraxmaan Cabdishakuur Warsame, ayaa sheegay in dadaal kasta oo lagu hirgelinayo hub-ka-dhigis uu marka hore u baahan yahay heshiis siyaasadeed, isagoo ku tilmaamay hub-ka-dhigista hannaan siyaasadeed oo aan lagu koobi karin oo keliya hawlgal amni.
Cabdiraxmaan oo ka hadlayay Miizaan Podcast ee Dawan Media ayaa sheegay in heshiis siyaasadeed uu saldhig u yahay guusha hub-ka-dhigista.
“Hub-ka-dhigistu waa hannaan siyaasadeed,” ayuu yiri. “Heshiis siyaasadeed baa kow ku ah.”
Wuxuu sheegay in dowladda looga baahan yahay inay marka hore wax ka qabato sababaha keenay in dadka hubka qaataan, isla markaana dib loo soo celiyo kalsoonida shacabka ee hay'adaha dowladda.
“Haddii ay jirto sabab aan hub u qaato, oo sababtaas aan la igala hadlin, hubkayga lama qaadi karo,” ayuu yiri.