Jigjiga (Dawan)- Madaxweynaha Deegaanka Soomaalida, Mustafe Muxummed Cumar, ayaa munaasabad caleemo-saar ah loogu qabtay barxadda Madasha Dalxiiska ee Shabeelleey, kaddib markii baarlamaanka deegaanka uu dib ugu doortay xilka Madaxweynaha. Munaasabadda waxaa ka qaybgalay madaxda deegaanka, xildhibaanno, ururrada siyaasadda, odayaasha dhaqanka, waxgaradka, aqoonyahanka iyo qaybaha kala duwan ee bulshada.
Mustafe Cagjar ayaa markii ugu horreysay hoggaanka deegaanka qabtay Agoosto 2018, kaddib markii xilka laga qaaday madaxweynihii xilligaas, Cabdi Maxamuud Cumar, oo loo yaqaannay Cabdi Iley. Waxaa si rasmi ah loogu doortay madaxweynaha deegaanka Oktoobar 2021.
Khudbaddiisa, Cagjar wuxuu sheegay in xukuumaddiisu sii xoojin doonto horumarka iyo waxqabadka ka socda deegaanka, isagoo mudnaan siiyey nabadgelyada, xorriyatul-qowlka iyo adeegyada bulshada.
