Washington (Dawan) – Madaxweynaha Somaliland, Cabdiraxmaan Maxamed Cabdullaahi Cirro, ayaa dekedda Berbera, khayraadka macdanta iyo fursado ganacsi, oo ay ku jirto dhismaha Trump Tower, u soo bandhigay Mareykanka, isaga oo doonaya inuu soo jiito Madaxweyne Donald Trump, isla markaana taageerada Mareykanka ugu beddesho aqoonsi rasmi ah.
Cirro ayaa wareysi uu siiyay warbaahinta Semafor ku caddeeyay in Somaliland ay diyaar u tahay inay wax muuqda miiska soo saarto si ay u hesho waxa ay muddada dheer raadinaysay ee ah aqoonsi caalami ah.
“Wax bilaash ah ma bixinayno. Waa inaan wax soo bandhignaa, dhinaca kalena waxaan ka filaynaa fursado la mid ah ama u dhigma,” ayuu yiri Cirro.
Hadalka Cirro wuxuu muujinayaa in ololaha aqoonsi-raadinta Somaliland uu galay marxalad ku dhisan gorgortan toos ah, iyadoo Somaliland ay soo bandhigayso marin istaraatiiji ah, khayraad dabiici ah iyo fursado maalgashi, halka ay Washington ka doonayso aqoonsi iyo taageero amni.
Dekedda Berbera ayaa udub-dhexaad u ah soo-jeedinta Cirro. Dekeddu waxay ku taallaa Gacanka Cadmeed, meel u dhow marin-biyoodka Baabul-Mandab oo isku xira Badda Cas iyo Badweynta Hindiya, isla markaana ka mid ah marinnada ganacsi ee ugu muhiimsan dunida.
Markii la weydiiyay in uu meesha ka saarayo suurtagalnimada in Mareykanka, Israa’iil ama dalal kale ay saldhig ka samaystaan Somaliland, Cirro wuxuu sheegay inuusan arrintaasi diidi doonin. Waxa uu xusay in heshiis kasta uu ku xirnaan doono waxa ay Somaliland beddelkeeda ka helayso, sida aqoonsi, taageero amni iyo xoojinta ciidamadeeda.
