Hargeysa (Dawan)— Madaxweynaha Somaliland, Cabdiraxmaan Maxamed Cabdillaahi (Cirro), ayaa Sabtidii Hargeysa kulan kula yeeshay siyaasiyiin ka soo jeeda bariga gobolka Sanaag oo dhawaan dib ugu soo laabtay Somaliland, iyadoo kulanka diiradda lagu saaray isu-soo-dhoweynta siyaasadeed iyo bulshada.
Cirro ayaa siyaasiyiinta u sheegay inaan loo arag marti la soo dhoweynayo, balse ay yihiin dad dib ula midoobaya bulshadooda iyo deegaankooda, isagoo ku adkaystay in kala duwanaanshaha siyaasadeed aanu noqon karin xuduud dadka kala fogeysa.
Madaxweynaha ayaa sheegay in dadku ku kala aragti duwanaan karaan siyaasadda, balse taasi aysan meesha ka saarayn xiriirka iyo wadajirka bulshada.
