Muxuu Farmaajo ka yiri doorashada la isku khilaafsan yahay ee Koonfur Galbeed?

Muqdisho (Dawan) – Madaxweynihii hore ee Soomaaliya, Maxamed Cabdullaahi Farmaajo, ayaa soo dhaweeyay doorashada la isku khilaafsan yahay ee ka dhacday dowlad-goboleedka Koonfur Galbeed, taas oo dib loogu doortay Madaxweynaha maamulkaas Cabdicasiis Xasan Maxamed (Laftagareen).

Farmaajo ayaa bayaan uu soo saaray ugu hambalyeeyay Madaxweynaha dib loo doortay, isagoo sidoo kale bogaadiyay doorashada Guddoomiyaha Golaha Wakiillada iyo ku-xigeennadiisa, kuwaas oo isla maanta lagu doortay magaalada Baydhabo.

Wuxuu Farmaajo ku baaqay in hoggaanka cusub ee Koonfur Galbeed ay xoogga saaraan dib-u-heshiisiinta bulshada, xoojinta amniga, iyo dhammaystirka howlgallada ka dhanka ah Al-Shabaab ee ka socda deegaannada maamulkaas.

“Hoggaanka la doortay waxaa horyaalla waajibaad culus oo ay ugu horreeyaan dib-u-heshiisiinta, xoreynta deegaannada ay weli haystaan argagixisadu, iyo horumarinta adeegyada aasaasiga ah ee dadweynaha,” ayuu yiri Farmaajo.

Doorashada Koonfur Galbeed ayaa timid iyadoo ay jiraan muran siyaasadeed oo la xiriira hannaanka loo maray, iyadoo qaar ka mid ah siyaasiyiinta iyo dhinacyada mucaaradka ay su’aalo ka keeneen hufnaanta iyo sharciyadda geeddi-socodka doorashada.

Si kastaba ha ahaatee, Farmaajo ayaa xusay in doorashooyinka dowlad-goboleedyadu ay yihiin tiir muhiim u ah xasilloonida siyaasadeed iyo dhismaha nidaamka federaalka ee dalka, isagoo ku boorriyay dowlad-goboleedyada muddada dhaafka ah inay si degdeg ah u qabtaan doorashooyin.

Doorashadan ayaa lagu qabtay hal maalin gudaheed, iyadoo hal fadhi lagu doortay Madaxweynaha, Guddoomiyaha iyo labada Guddoomiye ku-xigeen ee Golaha Wakiillada Koonfur Galbeed, arrintaas oo dhalisay su’aalo la xiriira hufnaanta iyo sax ahaanshaha geeddi-socodka.

Doorashadu waxay ku soo aadaysaa xilli uu khilaaf xooggan ka taagan yahay dowlad-goboleedka Koonfur Galbeed iyo dowladda dhexe, iyadoo deegaanno kale oo ka tirsan maamulkaas ay ku sugan yihiin ciidamo iyo maamulo ka soo horjeeda maamulka Baydhabo.