Muqdisho (Dawan) – Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa maanta oo Talaado ah magaalada Muqdisho kula kulmay Darin LaHood, oo ah xildhibaan ka tirsan Aqalka Wakiillada Mareykanka, iyagoo ka wada hadlay xoojinta iskaashiga dhinacyada amniga, la-dagaallanka argagixisada, ganacsiga iyo maalgashiga, sida lagu sheegay war-saxaafadeed ka soo baxay Madaxtooyada Soomaaliya.
"Kulanka ayaa diiradda lagu saaray xoojinta xiriirka istaraatiijiga ah ee u dhexeeya Soomaaliya iyo Mareykanka ee dhinacyada xoojinta nabadda, amniga, la dagaallanka argagixisada, iyo arrimaha kale ee ganacsiga iyo dhiiragelinta maalgashiga" ayaa lagu yiri; war-saxaafadeedka Madaxtooyada .
Madaxweyne Xasan Sheekh Maxamuud ayaa uga mahadceliyay dowladda Mareykanka taageerada ay la garab taagan tahay Soomaaliya, isagoo carrabka ku adkeeyay sida ay uga go’an tahay dowladda Federaalka Soomaaliya horumarinta xaaladda amniga iyo abuurista jawi ku habboon oo dhiirrigeliya maalgashiga gudaha iyo dibadda.
