Dhuusamareeb (Dawan) – Madaxweynaha Soomaaliya Xasan Sheekh Maxamuud ayaa sheegay in doorashada hadda ka socota dalka ay tahay mid ka wanaagsan doorashooyin badan oo ka dhacay dalal Afrikaan ah, isagoo xusay in Soomaaliya ay soo martay marxalado adag oo ay ku jireen burbur dowladeed iyo dagaallo sokeeye.
Madaxweyne Xasan Sheekh oo xalay ka hadlay munaasabad ka dhacday Dhuusamareeb oo lagu dabaaldegayay aas-aaskii 11-aad ee Galmudug ayaa sheegay in Soomaaliya ay khibrad ka dhaxashay doorashooyinkii hore ee dalka, kuwaas oo uu sheegay inay la socdeen caqabado, colaado iyo duruufo adag.
“Doorashada ilaa iyo hadda Soomaaliya ka socotaa, runtii waddamo badan oo Afrikaan ah oo aan dowlad burbur ku dhicin, dagaal sokeeye ka dhicin, ayay aad iyo aad u qurux badan tahay oo ay ka fiicantahay,” ayuu yiri Madaxweyne Xasan Sheekh.
Wuxuu sheegay in doorashooyinkii dadbanaa ee hore ay Soomaaliya soo martay duruufo kala duwan, isla markaana hadda la joogo marxalad kale oo dalka muhiim u ah.
