Muqdisho (Dawan)– Ra’iisul Wasaaraha Soomaaliya, Xamse Cabdi Barre, ayaa ka jawaabay dhaliisha loo jeedinayo muddada xilka shanta sano ah ee lagu qoray Dastuurka, isla markaana ay dowladda hore uga bilowday ku dhaqankeeda. Wuxuu sheegay in muddadaasi aysan badnayn, isla markaana ku yaraan karto hirgelinta mashaariicda waaweyn ee dalka.
Wareysi uu siiyay barnaaminka Miizaan Podcast ee ka baxa Dawan Media, ayuu Xamse ku sheegay in mashaariicda waaweyn ay u baahan yihiin waqti ku filan oo lagu qorsheeyo laguna fuliyo. Sida uu sheegay, muddo xilkeed afar sano ah ayaa dhammaan karta iyadoo mashruuc uu hoggaamiye bilaabay uusan weli meel fog gaarin.
“Anigu waxaan qabaa shanta sano waa yar tahayba. Ma badna,” ayuu yiri.
Ra’iisul Wasaaruhu wuxuu sidoo kale sheegay inuu ka mid ahaa dadkii doonayay in dalka laga sameeyo xilka madaxweyne ku-xigeenka, balse qodobkaasi uu ka mid noqday arrimihii doodda badan dhaliyay intii laga hadlayay Dastuurka. Wuxuu tilmaamay in waxyaabo badan oo uu shaqsiyan ka rabay Dastuurka laga beddelay ka hor inta uusan Baarlamaanku u codeyn.
