Muxuu Wasiirka Arrimaha Dibadda Israa’iil ku sababeey aqoonsiga Somaliland?

Hargeysa – 6 Janaayo 2026 (Dawan)- Madaxweynaha Somaliland Cabdiraxmaan Maxamed Cabdullaahi (Cirro) ayaa maanta oo Talaado ah qaabilay Wasiirka Arrimaha Dibadda Israa’iil, Gideon Sa’ar, oo booqasho rasmi ah ku tegay Hargeysa, kaddib markii Israa’iil ay si rasmi ah u aqoonsatay Somaliland dhammaadkii bishii Diseembar ee la soo dhaafay.

Kulankan ayaa yimid saacado kaddib markii Wasiirka Arrimaha Dibadda Israa’iil uu gaaray Hargeysa, waana booqashadii ugu horreysay ee noocan ah ee uu wasiir arrimo dibadeed oo Israa’iili ah ku tago Somaliland, taas oo ay xukuumadda Somaliland ku tilmaantay tallaabo diblomaasiyadeed oo taariikhi ah.

Bayaan ka soo baxay Madaxtooyada Somaliland ayaa lagu sheegay in wada-hadallada Cirro iyo Sa’ar ay diiradda ku saarnaayeen iskaashiga dhinacyada siyaasadda, dhaqaalaha, amniga iyo horumarinta xiriirka caalamiga ah, iyadoo la tixraacayo aqoonsiga ay Israa’iil u fidisay Somaliland 26-kii Diseembar 2025.

Madaxweyne Cirro ayaa soo dhoweeyay go’aanka Israa’iil, isaga oo ku tilmaamay fursad istiraatiiji ah oo kor u qaadi karta maalgashiga, ganacsiga, tignoolajiyada, tamarta, biyaha, beeraha iyo kaabayaasha dhaqaalaha. Waxa uu xusay in Somaliland ay diyaar u tahay iskaashi ballaaran oo ku dhisan dano wadaag ah.

Dhankiisa, Wasiirka Arrimaha Dibadda Israa’iil Gideon Sa’ar ayaa sheegay in dalkiisa ay ka go’an tahay xoojinta xiriir dhow oo dhinacyo badan leh oo uu la yeesho Somaliland. Waxa uu aqoonsiga ku sababeeyay, sida uu sheegay, xaqa ay Somaliland u leedahay go'aankeeda la xiriirka is maamulid iyo doorka ay ku leedahay xasilloonida Geeska Afrika.

Sa’ar ayaa sidoo kale ammaanay heerka amniga iyo nidaamka dimuqraadiyadeed ee Somaliland, isaga oo ballanqaaday in Israa’iil ay ka shaqayn doonto kor u qaadista wacyiga caalamiga ah ee ku saabsan maqaamka siyaasadeed ee Somaliland.

Booqashadan iyo kulanka ka dhacay Hargeysa ayaa imanaya xilli uu sii xoogaysanayo xasaradda diblomaasiyadeed oo ku saabsan aqoonsiga Israa’iil, iyadoo Dowladda Federaalka Soomaaliya ay horay u cambaaraysay tallaabadaas, kuna tilmaantay mid ka dhan ah madax-bannaanida iyo midnimada dhuleed ee dalka.