Jigjiga (Dawan)— Dawlad Deegaanka Soomaalida ayaa ballanqaadday inay taageeri doonto maalgashiga warshadaha iyo dhaqaalaha cagaaran, iyadoo sheegtay inay fududaynayso adeegyada aasaasiga ah ee ay u baahan yihiin maalgashadayaasha.
Madaxweyne ku-xigeenka Dowlad Deegaanka Soomaalida, Ibraahim Cusmaan Faarax, ayaa arrintan sheegay xilli magaalada Jigjiga laga daahfurayay Talaadadii shirkadda Som-Eco Waste Solutions and Recycling, oo ka shaqayn doonta maareynta iyo dib-u-warshadaynta qashinka qalalan. Shirkadda, oo ay aasaaseen gabdho qurbejoog ah, ayaa la filayaa inay gacan ka geysato yaraynta qashinka, hagaajinta nadaafadda magaalooyinka iyo abuurista fursado shaqo.
Ibraahim Cusmaan Faarax ayaa sheegay in xukuumadda deegaanku ay ka caawin doonto maalgashadayaasha helitaanka adeegyada muhiimka u ah warshadaha, oo ay ku jiraan biyaha, korontada, waddooyinka iyo suuqyada. Wuxuu sheegay in warshaduhu u baahan yihiin maalgelin ballaaran, shaqaale xirfad leh iyo dulqaad, balse ay muhiim u yihiin kobaca wax-soo-saarka iyo shaqo-abuurka.
Madaxweyne ku-xigeenka ayaa shirkadda ugu baaqay inay hawlaheeda gaarsiiso magaalooyinka kale ee waaweyn ee deegaanka, si loo yareeyo qashinka, loona wanaajiyo nadaafadda iyo bilicda magaalooyinka.
