Muqdisho (Dawan) – Soomaaliya ayaa daahfurtay mashruuc lagu xoojinayo adkeysiga xoola-dhaqatada iyo beeralayda, iyadoo dowladda ay sheegtay in barnaamijkan uu ka jawaabayo saameynta isbeddelka cimilada ee ku dhacday bulshooyinka ku tiirsan xoolaha iyo beeraha.
Mashruuca ayaa diiradda saaraya sidii loo dhisi lahaa awoodda qoysaska xoola-dhaqatada iyo beeralayda ah, si ay uga soo kabtaan abaaraha iyo fatahaadaha soo noqnoqda, kuwaas oo waxyeello u geystay daaqa, biyaha, dalagyada iyo hab-nololeedka miyiga.
Xoolaha iyo beeraha ayaa laf-dhabar u ah nolosha malaayiin qof oo Soomaaliyeed. Hase yeeshee, sanadihii dambe, abaaro daba-dheeraaday iyo fatahaado xooggan ayaa wiiqay wax-soo-saarka, sidoo kalena kordhiyay barakaca, isla markaana hoos u dhigay awoodda qoysaska miyiga ee ku tiirsan dhaqashada xoolaha iyo beerashada dalagyada.
Dowladda ayaa sheegtay in mashruucan lagu xoojinayo la-qabsiga isbeddelka cimilada, adkeynta kaabayaasha wax-soo-saarka, iyo taageeridda bulshada nugul si ay u helaan habab nololeed oo waara.
