Muqdisho (Dawan) – Xisbiga Nabad iyo Nolol ayaa soo bandhigay hannaan doorasho axsaab ah oo uu ku sheegay in diiwaangelinta codbixiyeyaasha iyo codeyntuba ay ka wada dhacayaan hal goob iyo hal maalin, si shacabka Soomaaliyeed ay ugu suurtagasho inay si sahlan, xor ah, isla markaana lagu kalsoonaan karo ugu codeeyaan xisbiga ay dooranayaan.
Soo jeedintan ayaa lagu soo bandhigay wareeggii labaad ee wadahadallada magaalada Muqdisho uga socda dowladda Federaalka Soomaaliya iyo dhinacyada mucaaradka, kuwaas oo ay fududeynayso dowladda Turkiga.
Kulankii maanta ayaa si gaar ah u dhexmaray dowladda Federaalka Soomaaliya iyo xisbiga Nabad iyo Nolol. Kulanka waxaa goobjoog ka ahaa wakiillo ka socday Turkiga, Mareykanka, Ingiriiska, Midowga Yurub iyo Qaramada Midoobay, kuwaas oo qeyb ka ah dadaallada lagu doonayo in xal siyaasadeed looga gaaro khilaafka ka taagan nooca doorasho ee dalka ka dhaceysa.
Xisbiga Nabad iyo Nolol ayaa sheegay in qaabka doorashada ee uu soo jeediyay uu yahay mid si fudud loo fahmi karo, la wada aamini karo, lana wada arki karo, isla markaana ay adag tahay in lagu murmo ama lagu kala shakiyo natiijadeeda.
