Muqdisho – 5 Janaayo 2025 (Dawan)- Madaxweynaha Jamhuuriyadda Federaalka Soomaaliya, Xasan Sheekh Maxamuud, iyo Madaxweynihii hore ee dalka, ahna hoggaamiyaha xisbiga mucaaradka ee Himilo Qaran, Shariif Sheekh Axmed, ayaa heshiis ka gaaray khilaaf u dhexeeyey, kaddib kulan gaar ah oo ku dhex maray magaalada Muqdisho.
Sida lagu sheegay bayaan kasoo baxay xisbiga mucaaradka ee Himilo Qaran habeennimadii Axadda, kulanka ayaa ka dhacay hoyga madaxweynihii hore, waxaana lagu falanqeeyey tabashooyin siyaasadeed iyo kuwo shaqsi ah, kuwaas oo ugu dambeyn lagu gaaray is-afgarad buuxa, inkastoo aan la shaacin faahfaahinta tabashooyinka la xalliyey.
“Kulanka waxaa looga hadlay tabashooyin shaqsi ah, waxaana lagu gaaray is-afgarad buuxa,” ayaa lagu yiri bayaanka xisbiga Himilo Qaran.
Dhanka kale, Madaxtooyada Soomaaliya ama Madaxweynaha Xasan Sheekh Maxamuud wali kama aysan hadlin kulanka, balse xisbiga Himilo Qaran ayaa sheegay in madaxweynuhu muujiyey diyaar u ahaanshaha qabashada shir wadatashi qaran, kaas oo ay horey ugu baaqeen qaar ka mid ah daneeyayaasha siyaasadda mucaaradka.
