Muqdisho (Dawan) – Dowladda Soomaaliya iyo Qaramada Midoobay ayaa ka wada hadlay xoojinta dadaallada gurmadka musiibooyinka iyo hagaajinta isku-duwidda howlaha bini’aadannimo, sida ay sheegtay Hay’adda Maareynta Musiibooyinka Qaranka (SoDMA).
Kulanka waxaa si wadajir ah u guddoomiyay Guddoomiyaha SoDMA, Maxamuud Macalin Cabdulle, iyo Kaaliyaha Xoghayaha Guud ee Qaramada Midoobay, ahna Kaaliyaha Maamulaha iyo Agaasimaha Waaxda Dhibaatooyinka ee UNDP, Shoko Noda.
Waxaa sidoo kale ka qeyb galay mas’uuliyiin ka socday Dowladda Federaalka Soomaaliya, oo ay ku jiraan Xafiiska Ra’iisul Wasaaraha, Wasaaradda Deegaanka iyo Isbeddelka Cimilada, Wasaaradda Tamarta iyo Khayraadka Biyaha, iyo wakiillo ka socday hay’adaha Qaramada Midoobay, aqoonyahanno iyo ganacsato.
Sida SoDMA ay sheegtay, kulanka oo ahaa mid istiraatiiji ah ayaa diiradda lagu saaray xoojinta ka jawaabista musiibooyinka, hagaajinta isku-duwidda hay’adaha iyo kor u qaadista adkeysiga bulshada Soomaaliyeed ee la tacaalaysa saameynta isbeddelka cimilada.
