Soomaaliya, 19 Maarso (Dawan ) – Madaxweynaha Soomaaliya ayaa Khamiistii ku baaqay in wadahadal lagu soo afjaro colaaddda ka socota Bariga Dhexe, isagoo ka digay in xiisadahaasi ay sare u qaadeen qiimaha badeecooyinka muhiimka ah isla markaana ay sii kordhiyeen culayska dhaqaale ee shacabka.
Madaxweyne Xasan Sheekh Maxamuud ayaa sheegay in isbeddellada suuqyada caalamiga ah ee ka dhashay colaadaha ay saameyn ku yeesheen qiimaha maciishadda iyo shidaalka gudaha Soomaaliya.
“Colaadaha Bariga Dhexe ayaa uga sii daray xaaladda, waxayna saameyn ku yeesheen qiimaha badeecooyinka muhiimka u ah nolosha bulshada,” ayuu yiri madaxweynaha, isagoo khudbad ka jeedinayay munaasabadda Ciidul Fidriga.
Wuxuu ugu baaqay dhinacyada ku lugta leh colaadaha inay khilaafaadkooda ku xalliyaan wadahadal si looga hortago saameyn dhaqaale iyo mid bani’aadamnimo oo sii ballaarata.