M/W Xasan iyo mucaaradka oo caawa kawada hadlaya go’aanka Israa’iil ee Somaliland

Muqdisho ( Dawan) – Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa caawa kulan muhiim ah la yeelan doona hoggaamiyayaasha mucaaradka ee ku sugan Muqdisho, kaasoo lagu wada hadlayo arinta xiisadda dhalisay ee aqoonsiga Israa’iil u siiday Somaliland.

Kulankan oo ka dhici doona Madaxtooyada Soomaaliya ayaa looga gol leeyahay in la xaqiijiyo mowqif mideysan oo dowladda iyo mucaaradka ah, kaasoo difaacaya madax-bannaanida iyo midnimada dhuleed ee Soomaaliya.

Ilo ka tirsan Madaxtooyada ayaa xaqiijiyay in kulanka lagu adkeyn doono mowqifka mideysan ee dalka, iyadoo mucaaradka iyo xukuumaduba ay ka soo saari doonaan taageero buuxda oo ku aaddan ilaalinta madax-bannaanida Soomaaliya iyo ka hortagga qorshayaasha Israa’iil ee lagu doonayo in lagu wiiqo midnimada dalka.

Madaxweynaha ayaa sidoo kale xalay khadka taleefanka kula xiriiray madax hore oo ka tirsan dalka iyo xubno ka tirsan Madasha Samata Bixinta Soomaaliyeed, kuwaasoo si wadajir ah ugu raacay in la difaaco midnimada iyo madax-bannaanida dalka, loona hortago damaca Israa’iil ee gobolka Geeska Afrika.

Sidoo kale, Xasan Sheekh ayaa wada wadatashiyo caalami ah la samaynaya hoggaamiyayaasha dalalka Jabuuti, Kenya, Tanzania, iyo Uganda, si loo xoojiyo taageerada caalamiga ah ee Soomaaliya.

Kulanka caawa ayaa la filayaa in la soo saaro war-saxaafadeed mideysan oo cambaareynaya go’aanka Israa’iil ee aqoonsiga Somaliland, loona muujinayo sida ay Soomaaliya u adkeysan doonto midnimadeeda iyo madax-bannaanideeda