Muqdisho, (Dawan ) – Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa si adag uga hadlay aqoonsiga ay Israa’iil ku dhawaaqday ee Somaliland, isaga oo ku tilmaamay tallaabo halis ku ah amniga qaranka, midnimada dalka, iyo xasilloonida guud ee Geeska Afrika.
Madaxweynaha ayaa sheegay in qorshaha Israa’iil uusan ku salaysnayn danaha shacabka Soomaaliyeed, balse uu yahay mid lagu doonayo in qaybo ka mid ah deegaannada waqooyi ee Soomaaliya loogu beddelo saldhigyo militari oo laga fuliyo howlgallo ka dhan ah dalal kale, taas oo keeni karta dagaallo iyo colaado aysan Soomaalidu wax door ah ku lahayn, balse ay iyagu noqdaan kuwa ugu horreeya ee dhibaatadu gaarto.
“Mudane Madaxweyne, shacabka gobolladaas ku nool waxaan u sheegayaa; waxaa la doonayaa in deegaannadiinna laga dhigo saldhigyo looga duulo dalal kale, lagana huriyo colaado iyo dagaallo aydaan idinku qeyb ka ahayn,” ayuu yiri Madaxweyne Xasan Sheekh Maxamuud, isagoo ka digay cawaaqibta ka dhalan karta aqoonsigaas.
Madaxweynaha ayaa sidoo kale ugu baaqay shacabka Soomaaliyeed in ay si qoto dheer uga fakaraan sababaha dhabta ah ee ka dambeeya aqoonsiga Israa’iil ee Somaliland, isaga oo su’aal geliyay danaha ay Israa’iil ka leedahay deegaannada waqooyi ee Soomaaliya.“Walaal bal fakar: Israaill deris maahin, dano dhaqaale, dhaqan iyo diineed waligeen nama dhex marin waa maxay sababta ay ula soo boodday ictiraaf beeneedkaan” ayuu hadalkiisa ku daray.
