Nin lagu eedeeyay inuu xiray bullaacadaha Muqdisho oo la xiray

Soomaaliya (Dawan) – Ciidanka Booliiska Gobolka Banaadir ayaa gacanta ku dhigay nin lagu magacaabo Maxamed Axmed Maxamed, kaas oo lagu eedeeyay inuu si ula kac ah u xiray bullaacadaha biyaha qaada ee ku yaalla waddada 21-ka Oktoobar, gaar ahaan agagaarka Enza Home ee magaalada Muqdisho.

Sida uu sheegay Booliisku, eedeysanaha ayaa lagu tuhunsan yahay inuu bullaacadaha ku xiray caagado 20-litir ah oo biyaha laga cabo, taasoo carqaladeysay qulqulka biyaha roobka isla markaana sababtay fatahaad iyo hakad ku yimid isu-socodka gaadiidka iyo dadweynaha isticmaala waddada.

Waddada 21-ka Oktoobar ayaa leh nidaam bullaacado oo loogu talagalay qaadista biyaha roobka, hase yeeshee muddooyinkii u dambeeyay waxaa ku soo noqnoqday biyo fariisin, kuwaas oo saameyn ku yeeshay isu-socodka gaadiidka iyo dhaqdhaqaaqa bulshada. Arrintaasi ayaa dhalisay walaac ku saabsan sababaha keenay in biyuhu ku xirmaan waddada.

Booliiska Gobolka Banaadir ayaa sheegay in eedeysanaha uu haatan ku jiro gacanta ciidamada, islamarkaana uu socdo baaritaan la xiriira kiiska. Waxay intaa ku daray in marka baaritaannadu soo dhammaadaan loo gudbin doono maxkamadda awoodda u leh si sharciga loo waafajiyo.