Muqdisho (Dawan) – Hay’adda Sirdoonka iyo Nabadsugidda Qaranka Soomaaliya (NISA), oo kaashanaysa saaxiibada caalamka, ayaa shan xubnood oo ka tirsan Al-Shabaab ku dishay howlgal ay ku tilmaamtay mid qorsheysan oo ka dhacay deegaanka Tardo, sida lagu sheegay war-saxaafadeed ay NISA soo saartay.
Sida hay'adda sheegtay xalay oo Axad ah howlgalkan ayaa lagu bartilmaameedsaday goobo ay kooxda u adeegsan jireen qorsheynta falal amni-darro ah oo ka dhan ah shacabka iyo ciidamada dowladda. NISA ayaa sheegtay in xog sirdoon ay xaqiijisay in deegaanka Tardo lagu ururiyey ilaa 25 xubnood oo isugu jiray dahaalyahano iyo hogaamiyeyaal, kuwaas oo qorsheynayay falal lagu carqaladeynayo amniga gobolka.
“Ciidamada ammaanku waxay diiradda saareen goobaha ugu muhiimsan ee kooxda Al-Shabaab, howlgalkaasna wuxuu jab culus ku riday abaabulkii iyo dhaq-dhaqaaqii kooxda ee deegaanka,” ayaa lagu yiri war-saxaafadeedka NISA.
