Muqdisho (Dawan)- Xoghayaha Guud ee Ururka Caddaaladda iyo Wadajirka, Xildhibaan Cabdiraxmaan Maxamed Xuseen (Odawaa), ayaa Dawan TV u xaqiijiyay inuu u taagan yahay xilka Madaxweynaha Soomaaliya 2026.
Odawaa oo khadka taleefanka kula hadlay Dawan TV, ayaa sheegay in qorshaha uu doorashada ku galayo uu dhawaan taageerayaashiisa u soo bandhigi doono. Balse hadda, wuxuu xaqiijin karaa in isaga iyo kooxdiisu go’aamiyeen inuu isu taago xilka Madaxweynaha Jamhuuriyadda Federaalka Soomaaliya doorashada la filayo inay ka qabsoonto dalka sanadkan 2026.
“Mas’uul khibrad siyaasadeed leh oo jiilkii hore la soo shaqeeyay, dhallinyaradana la jaanqaadi karo, baahiyahooda fahmaayo, aqoon lagu maareeyn karana leh ayuu dalkeena u baahan yahay,” ayuu ku soo koobay Odawaa.
Dawan TV ayaa ogaatay in khilaaf xooggan uu soo kala dhex galay Madaxweyne Xasan Sheekh Maxamuud iyo Xildhibaan Odawaa, kadib markii uu Odawaa ku wargeliyay inuu yahay musharrax madaxweyne. Madaxweyne Xasan Sheekh ayaa isna horay u xaqiijiyay inuu xilka madaxweynenimo mar afaraad u taagan yahay.