Muqdisho (Dawan)- Magaalada Muqdisho waxaa xalay ka dhacay kulan muhiim ah oo ay isugu yimaadeen qaar ka mid ah odayaasha dhaqanka iyo siyaasiyiinta mucaaradka, kaas oo diiradda lagu saaray sidii xal loogu heli lahaa ismari-waaga siyaasadeed ee dalka.
Kulankan ayaa lagu falanqeeyay waddooyinka lagu gaari karo is-afgarad siyaasadeed, iyadoo xoogga la saaray in xaaladda adag looga gudbo wada-hadal iyo heshiis horseeda dowlad-dhis dhammaystiran.
Xubnaha mucaaradka ayaa sheegay in ujeeddada kulanka ay ahayd in odayaasha ay ka dhageystaan natiijooyinkii ka soo baxay wada-hadallo ay habeenno ka hor la yeesheen Madaxweynaha Xasan Sheekh Maxamuud.
Madaxweynihii hore, Shariif Sheekh Axmed, oo kulanka ka hadlay, ayaa yiri: “Ujeedkeenna waxa weeye in odayaasha arrintaas qoorta u galino oo aan weydiino: ninkii odayga ahaa waa idiin dirnayee, maxaad ka keenteen? Haddii laga quusto, maxaa talo ah oo u furan Soomaaliya?”