Pakistan oo Soomaaliya ugu hambalyeysay maalinta Xorriyadda iyo Midnimada

Muqdisho (Dawan) – Dowladda Pakistan ayaa farriin hambalyo ah u dirtay Dowladda iyo shacabka Jamhuuriyadda Federaalka Soomaaliya, iyadoo ugu hambalyeysay munaasabadda Maalinta Xorriyadda iyo Midnimada Soomaaliya ee 1-da Luulyo.

War qoraal ah oo ay baahisay Wasaaradda Arrimaha Dibadda Pakistan ayaa lagu sheegay in dowladda Pakistan ay la wadaagayso Soomaaliya farxadda munaasabaddan qaran, isla markaana ay u dirtay hambalyo diirran Dowladda iyo shacabka Soomaaliyeed.

“Pakistan waxay hambalyada kal iyo laab ah u diraysaa Dowladda iyo shacabka Jamhuuriyadda Federaalka Soomaaliya. Maalin Xorriyadeed oo farxad leh,” ayaa lagu yiri farriinta Wasaaradda Arrimaha Dibadda Pakistan.

Pakistan ayaa ka mid ah dalalka Soomaaliya la leh xiriir saaxiibtinimo iyo iskaashi dhinacyo badan leh, waxaana labada dal ay ka wada shaqeeyaan arrimaha diblomaasiyadda, waxbarashada, amniga, ganacsiga iyo iskaashiga caalamiga ah.

Sidoo kale, Pakistan ayaa si joogto ah u muujisa taageerada ay u hayso Soomaaliya, gaar ahaan dhinacyada xoojinta xiriirka diblomaasiyadeed iyo iskaashiga u dhexeeya labada shacab.

Hambalyada Pakistan ayaa ku soo beegantay iyadoo Soomaaliya ay u dabaaldegayso sanad-guurada Maalinta Xorriyadda iyo Midnimada, oo ah munaasabad qaran oo lagu xuso xorriyadda gobollada Koonfureed iyo mideyntii Waqooyiga iyo Koonfurta Soomaaliya, taas oo saldhig u noqotay aas-aaska Jamhuuriyadda Soomaaliyeed.