Garoowe (Dawan)- Wasaaradda Waxbarashada iyo Tacliinta Sare ee Puntland ayaa shalay si cad uga jawaabtay ogaysiisa Wasaaradda Waxbarashada, Hiddaha iyo Tacliinta Sare ee Dowladda Federaalka Soomaaliya ee ku saabsan ka qeybgalka ardayda ka socota Puntland ee mashruuca waxbarashada Rajo Kaaba, oo uu maalgeliyo Bankiga Adduunka.
War-saxaafadeed ka soo baxay Wasaaradda Waxbarashada Puntland ayaa lagu sheegay in aysan jirin wax wada-tashi, heshiis ama is-afgarad rasmi ah oo dhexmaray Wasaaradda Puntland iyo Wasaaradda Waxbarashada ee Dowladda Federaalka, gaar ahaan ku saabsan qeybta Puntland ee mashruucan.
Dowladda Federaalka ayaa 2-dii Janaayo soo saartay fariin lagu ogeysiinayo gabdhihii u soo gudbay Wajiga 2aad ee Imtixaanka Deeqda Waxbarasho ee Heerka 2aad ee Mashruuca Rajo Kaaba, si ay uga soo qeyb galaan imtixaanka la qorsheeyay in uu dhaco 5 Janaayo, iyadoo la sheegay in 2,165 gabdhood ay codsadeen deeqda, 1,417-na ay u soo gudbeen imtixaanka u dambeeya.
