Soomaaliya, 31 Oktoobar 2025 — Puntland ayaa bilawday tababarka 1,000 askari cusub oo booliis ah, qayb ka ah dadaal lagu casriyeynayo hay’adda amniga iyo lagu xoojinayo wada-shaqeynta bulshada iyo booliiska.
Madaxweynaha Puntland, Siciid Cabdullaahi Deni, ayaa arrintan ku dhawaaqay intii lagu guda jiray kulan wacyigelin ah oo ka dhacay Jaamacadda Puntland State University (PSU) ee Garoowe Jimcihii. Kulanka ayaa waxaa ka qeyb-galay mas’uuliyiin ka tirsan dowladda, la-taliyeyaal madaxweyne, saraakiisha booliiska, maamulka gobolka Nugaal iyo degmada Garoowe, isimmo, haween, dhallinyaro, iyo qeybaha kala duwan ee bulshada.
Sida ay dowladda sheegtay, 500 askari ayaa horay u dhammaystay tababarka Kulliyadda Tababarka Booliiska ee Carmo, halka 500 kalena ay hadda tababar ku jiraan. Barnaamijkan tababarka ah ayaa la qorsheeyey inuu socdo ilaa sanadka 2028.
Madaxweyne Deni ayaa sheegay in qorshahan uu xooga saarayo xirfadaha, agabka, iyo awooda shaqo ee booliiska. Waxa uu sidoo kale xusay nidaam cusub oo lagu xoojinayo wada-shaqeynta booliiska iyo bulshada.
“System-kan waxa uu yahay in shacabka ay qayb ka noqdaan nidaamka amniga, waana hab caalami ah. Boolis yar oo magaalo jooga ma maareyn karaan xaalad kasta unless bulshada ay qeyb ka tahay ogaanshaha iyo warbixinta,” ayuu yiri Madaxweyne Deni.
Qorshaha casriyeynta booliiska ee Puntland, oo bilaabmay 2024, wuxuu ujeedkiisu yahay in la helo hay’ad amni oo xirfad leh, qalabaysan, islamarkaana diyaar u ah sugidda amniga iyo horumarinta wada-shaqeynta bulshada.