Puntland oo daah-furtay sanduuq lagu hormarinayo mashaariicda dowladaha hoose

Garoowe (Dawan ) – Dowlad Goboleedka Puntland ayaa daah-furtay qaab-dhismeed cusub oo sanduuq maaliyadeed oo loogu talagalay dowladaha hoose, kaas oo lagu xoojinayo mashaariicda horumarineed iyo isku-duwidda heerarka kala duwan ee Dowlad Goboleedka, sida ay sheegeen mas’uuliyiinta Puntland.

Hindisahan ayaa Arbacadii lagu daah-furay magaalada Garoowe, waxaana gudoomiyey Madaxweyne ku-xigeenka Puntland, Ilyaas Cismaan Lugatoor, intii uu socday shir lagu soo bandhigayay siyaasadda Sanduuqa Iskaashiga Dowladaha Hoose iyo sida uu ula jaanqaadayo Sanduuqa Horumarinta Puntland (PDF).

Mas’uuliyiintu waxay sheegeen in qaab-dhismeedkan cusub uu kor u qaadayo wada-shaqeynta u dhexeysa Dowlad Goboleedka iyo dowladaha hoose, isla markaana uu dardargelin doono bixinta adeegyada bulshada iyo hirgelinta mashaariicda horumarineed.

“Sanduuqan wuxuu door muhiim ah ka qaadan doonaa dib-u-habaynta iyo ballaarinta ilaha dhaqaale ee Puntland, isla markaana wuxuu suuragelin doonaa maalgelin joogto ah oo lagu taageero mashaariicda horumarineed,” ayuu yiri Lugatoor intii uu socday shirka.

Wuxuu sidoo kale carrabka ku adkeeyay muhiimadda ay leedahay in la helo kalsooni ballaaran oo ka timaadda dhammaan dhinacyada si sanduuqu u guuleysto.

“Sanduuqan waxaa la rabaa kalsoonida ugu badan ee cid walba oo qeyb ka ah inuu helo, inuu helo kalsoonidii dowladnimada, inuu helo kalsoonida ganacsatada, inuu helo kalsoonida qurbo joogta, inuu helo kalsooni deeqbixiyeyaasha iyo beesha caalamka,” ayuu yiri Lugatoor.

Sida ku cad faahfaahinta siyaasadda lagu soo bandhigay shirka, qaab-dhismeedka sanduuqa ayaa dhigaya nidaam maamul oo ay ka qeyb qaadanayaan Wasaaradda Arrimaha Gudaha iyo Wasaaradda Maaliyadda si ay u kormeeraan fulinta iyo isku-duwidda maaliyadeed.

Guddi hoggaamineed oo uu hoggaaminayo Wasaaradda Arrimaha Gudaha ayaa bixin doona jihaynta siyaasadda guud, halka guddi farsamo uu qaabilsanaan doono dabagalka hawlaha, hubinta u hoggaansanaanta iyo fulinta. Sidoo kale, Guddiga Maaliyadda Dowladaha Hoose ayaa soo jeedin doona talooyin ku saabsan sida loo qaybinayo dhaqaalaha, iyadoo ay taageerayaan xafiis xoghayn ah oo qaabilsan isku-duwidda iyo warbixinta maalinlaha ah.

Mas’uuliyiintu waxay sheegeen in isku-xiridda sanduuqan iyo Sanduuqa Horumarinta Puntland ay fududeyn doonto hababka maalgelinta isla markaana ay kor u qaadi doonto waxtarka hirgelinta mashaariicda.

Hindisahan ayaa qeyb ka ah dadaallada Puntland ay ku xoojinayso awoodda hay’adaha, ballaarinta ilaha dhaqaale iyo horumarinta adeegyada bulshada ee degmooyinka.