Garoowe (Dawan) – Madaxweynaha Puntland, Siciid Cabdullaahi Deni, ayaa Sabtidii xarigga ka jaray waddooyin cusub oo muhiim u ah isku socodka magaalada Garoowe, iyo barxaddii Garoowe oo dib loo casriyeeyay, taas oo loogu magac daray Alle ha u naxariistee General Qalyare, si loo xuso kaalintii uu ka qaatay dagaalka ka dhanka ahaa kooxda Daacish.
Maamulka Puntland ayaa sheegay in mashaariicdan ay qeyb ka yihiin dadaallada lagu horumarinayo kaabeyaasha dhaqaalaha iyo adeegyada bulshada, iyadoo mashruuca dhismaha waddooyinka uu taageero ka helay Bangiga Adduunka.
Madaxweyne Deni ayaa sheegay in mashaariicdan ay yihiin bilowga qorshe ballaaran oo lagu horumarinayo kaabeyaasha Puntland.
“Waa bilow wanaagsan. Waxaan rajeynayaa in dhammaan deegaannada Puntland baahiyaha ay u qabaan kaabeyaasha dhaqaalaha la dabooli doono, mashaariicda hadda socdana la dhammaystiri doono, kuwo cusubna la bilaabi doono,” ayuu yiri Madaxweyne Deni.
