Garoowe (Dawan) — Maamulka Puntland ayaa dalbaday faahfaahin ku saabsan duqeymo ka dhacay deegaanka Garmaal ee gobolka Nugaal, xilli ay xeebaha Soomaaliya ka soo cusboonaadeen weerarrada burcad-badeedda.
Wasaaradda Amniga Puntland ayaa bayaan ay soo saartay Jimcihii ku sheegtay inay cambaaraynayso falalka burcad-badeednimada ee ka soo cusboonaaday xeebaha Puntland, iyadoo sidoo kale sheegtay inay xog ka hayso awoodo ka baxsan Puntland oo qayb ka ah hawlgallada la xiriira burcad-badeedda.
Wasaaraddu waxay sheegtay in duqeymo lagu qaaday deegaanka Garmaal intii u dhaxaysay 18-ka iyo 20-ka Agoosto, ayna ku dhinteen dad ay ku tilmaantay kalluumaysato iyo dad deegaanka ah.
Waxay dowladaha leh maraakiibta caalamiga ah ee ku lugta leh hawlgallada ka dhanka ah burcad-badeedda ugu baaqday inay bixiyaan jawaab ku saabsan dhacdooyinka.
Dhacdadan ayaa timid maalin kadib markii markabka xamuulka ee M/V LUTUF, oo wata calanka Cameroon, lagu afduubtay meel u dhow Marraya ee degmada Eyl. Sida ay sheegtay Associated Press, markabka ayaa loo kaxeeyay dhanka xeebaha Nugaal, halkaas oo diyaarado aan duuliye lahayn iyo diyaarado kale oo Turki ah lagu arkay iyagoo la socda xaaladda markabka.