Soomaaliya, 19 Oktoobar 2025 — Wasaaradda Kalluumeysiga iyo Khayraadka Badda ee Dowladda Goboleedka Puntland ayaa heshiis deeq waxbarasho la gashay Jaamacadda Pwani ee dalka Kenya, kaas oo loogu talagalay in shaqaalaha wasaaradda ay sii wataan waxbarashada heerka Master-ka.
Barnaamijkan, oo loogu magac daray Kalluun Scholarship Program, ayaa lagu xoojinayaa xirfadaha farsamo ee maamulka kalluumeysiga iyo horumarinta waara ee khayraadka badda ee Puntland.
Heshiiska waxaa Sabtidii magaalada Garowe ku saxiixay Wasiirka Kalluumeysiga Puntland, Abdirisak Abdulahi Haga; Wasiir Ku-xigeenka Mohamoud Ali Gabah; Guddoomiyaha Jaamacadda Pwani, James Kahindi; iyo Hormuudka Kuliyadda Culuumta Badda iyo Kalluumaysiga, Bernerd Fulanda.
Xafladda saxiixa waxaa sidoo kale ka qaybgalay Wasiirka Shaqada, Cabdirahman Habarwaa; Hantidhowraha Guud, Cismaan Maxamuud Cali; iyo maamulayaal ka socday jaamacadaha gobolka, oo ay ka mid yihiin East Africa University iyo CityCot.
Wasiir Xagaa ayaa xusay in iskaashigan uu ka dambeeyay falanqeyn iyo qiimeyn taxaddar leh oo lala kaashaday jaamacadaha gudaha, ujeeddadiisuna tahay in shaqaalaha wasaaradda ay helaan aqoon horumarsan oo aan hadda laga heli karin gudaha Puntland.
“Go’aan bay naga tahay inaan sii wadno howshaan illaa jaamacadeenu ay ka gaaraan heer ay bixiyaan waxbarashada heerka labaad, oo aan ka maranno inaan dibadda ,” ayuu yiri Wasiirka Kalluumeysiga Puntland.
Masuuliyiintu waxay sheegeen in iskaashigan uu kordhin doono awoodda shaqaalaha, balaarin doono xirfadaha farsamo ee kalluumeysiga iyo culuumta badda, isla markaana gacan ka geysan doono maamulka waara ee khayraadka badda Puntland.
Puntland, oo ah dowlad goboleed ku taalla waqooyiga-bari Soomaaliya, ayaa ku jirta deegaanada Soomaaliyeed ee leh xeebta ugu dheer dalka. Jaamacadda Pwani, oo la aasaasay 2007 kuna taalla dalka Kenya, ayaa bixisa culuum ay ka mid yihiin Culuumta Badda iyo Kalluumaysiga.