Soomaaliya, 29 Oktoobar 2025 — Madaxweynaha Puntland, Siciid Cabdullaahi Deni, ayaa Kala diray Talaadadii Maxkamadda Ciiddanka Qalabka Sida iyo Dembiyada Culus, isagoo ku sababeeyey cabashooyin soo noqnoqday oo ka yimid hoggaanka maxkamadda iyo baahida loo qabo dib-u-habeyn garsoor.
Qoraalka madaxweynaha ee ku xusan xeerkaan wuxuu tixraacayaa Qodobbada 80(19) iyo 87 ee Dastuurka Puntland, kuwaas oo ay sheegen inuu qeexayo awoodaha madaxweynaha ee maamulidda iyo kormeerka hay’adaha ammaanka. Qoraalka ayaa amray in lakala diro dhammaan guddoomiyeyaasha, garsoorayaasha, iyo dacwad oogayaasha maxkamadda, isla markaana kiisaska dambiyada culus lagu wareejiyo ku meel gaar ahaan maxkamadaha racfaanka Puntland ilaa maxkamad cusub la dhiso. Saraakiisha garsoorka hore in ay ku laabtaan talisyadoodii hore.
Xaaladda dastuuriga ah Haddaba Muxuu dhigayaa Dastuurka Puntland: Qodobka 80 wuxuu madaxweynaha siinayaa awood uu ku magacaabo guddoomiyaha, garsoorayaasha, iyo dacwad oogayaasha Maxkamadda Ciiddanka, balse si cad uma siinin awood uu ku burburiyo guud ahaan maxkamadda. Khubarada sharciga ayaa tilmaamay in tallaabo noocaas ah laga yaabo in ay u baahato oggolaansho dheeraad ah oo ka yimaada Golaha Garsoorka ama habraac kale, iyadoo ku xiran sida loo fasiray awoodaha madaxweynaha ee sharciga Puntland.
Madaxweyne Deni ayaa carabka ku adkeeyey in burburinta iyo dib-u-habaynta ay ujeedadoodu tahay in wax laga qabto cabashooyin muddo dheer jiray oo la xiriira caddaalad-darro iyo waxtar la’aan ka jirta nidaamka Maxkamaddaan.
