Garoowe (Dawan) – Wasiirka Arrimaha Gudaha, Federaalka iyo Dimuqraadiyeynta Dowlad Goboleedka Puntland, Cabdi Xirsi Cali (Qarjab), ayaa daah-furay Sabtidii kulan looga hadlayay sidii adeegyada aasaasiga ah iyo awoodaha dowladda loogu daadejin lahaa degmooyinka.
Kulanka ayaa diiradda lagu saaray maamul-daadejinta, iyadoo ujeeddadu tahay in awoodaha, masuuliyadaha iyo adeegyada dowladda si qorshaysan looga soo dejiyo heerarka sare ee maamulka loona gaarsiiyo degmooyinka.
Wasaaradda ayaa sheegtay in qorshuhu siinayo degmooyinka awood ay ku qorsheeyaan, ku maareeyaan kuna fuliyaan adeegyada aasaasiga ah ee bulshada.
Arrimaha diiradda lagu saaray waxaa ka mid ahaa sidii degmooyinka loogu awoodsiin lahaa bixinta adeegyada waxbarashada, caafimaadka, biyaha iyo adeegyada kale ee aasaasiga ah.
Wasaaraddu waxay sheegtay in maamul-daadejintu ay gacan ka geysan karto in adeegyada bulshada loo dhoweeyo shacabka, isla markaana kor loo qaado tayada, hufnaanta iyo helitaanka adeegyada.
