Puntland oo qorshaynaysa inay kordhiso dakhliga xeebaha

Boosaaso (Dawan) — Maamulka Puntland ayaa qorshaynaya inuu kordhiyo dakhliga ka soo xarooda xeebaha, iyadoo magaalada Boosaaso lagu qabtay kulan looga hadlay horumarinta, ururinta iyo hab-maamulka dakhliga laga helo khayraadka iyo adeegyada xeebaha.

Kulanka waxaa furay Agaasime Guud Ku-xigeenka Dakhliga ee Wasaaradda Maaliyadda Puntland, Cabdiqaadir Axmed Xaashi, waxaana ka qaybgalay masuuliyiin iyo saraakiil ka tirsan Wasaaradda Maaliyadda.

Doodaha kulanka ayaa diiradda lagu saaray sidii loo xoojin lahaa nidaamka ururinta dakhliga xeebaha, loo kordhin lahaa hufnaanta iyo isla-xisaabtanka, isla markaana loo xaqiijin lahaa in dakhliga ka soo baxa khayraadka iyo adeegyada xeebaha si nidaamsan ugu soo xaroodo khasnadda Puntland.

Xeebaha Puntland waxay leeyihiin fursado dhaqaale oo kala duwan, oo ay ka mid yihiin kalluumaysiga, ganacsiga badda, adeegyada dekedaha iyo hawlaha kale ee la xiriira dhaqaalaha badda.

Masuuliyiinta kulanka ka qaybgalay ayaa sidoo kale ka hadlay sidii loo horumarin lahaa diiwaangelinta iyo ururinta dakhliga, iyadoo la adeegsanayo habab casri ah oo lagu dabagalo laguna maareeyo ilaha dakhliga.

Qorshaha lagu kordhinayo dakhliga xeebaha ayaa qayb ka noqonaya dadaallada Puntland ee lagu xoojinayo dakhliga gudaha iyo maamulka maaliyadda, iyadoo sidoo kale la doonayo in si wanaagsan looga faa’iidaysto fursadaha dhaqaale ee ka jira xeebaha.

Dakhliga dheeraadka ah ee laga helo xeebaha ayaa, haddii si hufan loo maareeyo, kaalin ka qaadan kara maalgelinta adeegyada bulshada, mashaariicda horumarineed iyo hawlaha kale ee maamulka Puntland.