Puntland (Dawan) – Dowlad Goboleedka Puntland ayaa uga digay shirkadda SOMTURK iyo shirkado kale oo shisheeye inaysan wax howlgal ah ka fulin karin xeebaha iyo dhulka ay maamusho Puntland, gaar ahaan dhinacyada kalluumeysiga, ilaalinta xeebaha iyo maalgashiga kheyraadka badda, haddii aysan marka hore oggolaansho rasmi ah ka helin hay’adaha Puntland.
Warsaxaafadeed ay soo saartay Dowlad Goboleedka ayaa lagu sheegay in Puntland ay leedahay awood dastuuri ah oo uu ay ku maamusho, ku ilaaliso ugana faa’iideysato kheyraadka badda iyo dhulka ku jira deegaannadeeda.
Digniinta ayaa si gaar ah loogu xusay shirkadda SOMTURK, iyadoo Puntland sheegtay in shirkaddu aysan wax shaqo ah ka qaban karin xeebaha Puntland haddii aysan haysan fasax rasmi ah oo ka yimid maamulka. Puntland waxay ku doodday in hay’adaha Dowladda Federaalka aysan sharci ahaan awood u lahayn inay bixiyaan ruqsado ama galaan heshiisyo maalgashi oo khuseeya dhul iyo bad ay sheegtay inay hoos yimaadaan maamulka Puntland.
SOMTURK waa shirkad u xilsaaran maamulka iyo ruqsad-siinta kalluumeysiga ee biyaha Soomaaliya. Dowladda Federaalka Soomaaliya ayaa sheegtay in shirkadda loo aas aasay xoojinta wax-soo-saarka iyo maamulka kalluumeysiga, ilaalinta deegaanka badda iyo ka hortagga kalluumeysiga sharci-darrada ah. Dowladda ayaa sidoo kale sheegtay in shirkaddu qeyb ka tahay qorshe lagu horumarinayo dhaqaalaha buluugga ah iyo kordhinta dakhliga ka soo xarooda kheyraadka badda.
