Soomaaliya, 26 Nofeembar 2025 - Dowlad Goboleedka Puntland ayaa ka digtay heesashada kaarka aqoonsiga qaranka ee ay bixiso Hay’adda Aqoonsiga iyo Diiwaangelinta Qaranka (NIRA) iyadoo sheegtay inay xabsi dhigi doonto.
Digniintan ayaa Habeenkii Talaadada uu soo saaray Wasiirka Warfaafinta Puntland, Maxameed Caydiid Dirir, sheegay kaadhadhka aqoonsiga ay helayaan xubno ka tirsan Al-Shabaab, kuwaas oo ay dowladda federaalku u ogolaatay inay iska diiwaan geliyaan.
Wasiirku wuxuu adkeeyay in Puntland ay Al-Shabaab u aragto cadow, isla markaana aysan ka waaban doonin inay qabato qof kasta oo lagu helo kaarka NIRA.
Wuxuu yidhi:“Qof kasta oo qaata kaadhka NIRA, annaga Puntland waxaan u aragnaa Al-Shabaab cadow. Haddii (Madaxweynaha) Xasan uu ugu baaqay Al-Shabaab inay qaataan kaadhka NIRA, markaa qof kasta oo lagu arko kaadhka NIRA waa cadow, waxaana la qaban doonaa.”
