Garoowe, 8 Oktoobar 2025 — Afar xisbi siyaasadeed oo ka dhisan Puntland — IFIYE, MUSTAQBAL, MIDEEYE, iyo SINCAD — ayaa si wadajir ah u diiday heshiis dhawaan lagu kala saxiixday magaalada Nairobi ee dalka Kenya, kaas oo dhexmaray mas’uuliyiin ka kala socday Puntland iyo Somaliland.
Heshiiska, oo dhacay intii u dhaxeysay 4–5 Oktoobar 2025, ayaa diiradda saarayey iskaashi dhinaca amniga, la-dagaallanka argagixisada, iyo dib-u-heshiisiinta bulshada Ceerigaabo sida lagu sheegay qoraalka ay isla soo saareen labada dhinac.
Bayaan ay soo saareen kadib kulan degdeg ah oo ay ku yeesheen magaalada Garoowe Talaadadii, ayey xisbiyadu sheegeen in heshiiskaasi uu “u adeegayo ajandayaasha gooni-u-goosadka,” isla markaana uu “wax u dhimayo midnimada qaranka Soomaaliyeed.”
Xisbiyadu waxay sidoo kale ku eedeeyeen hoggaanka Puntland “inuu galay siyaasad aan jihaysan oo dano gaar ah ku saleysan,” iyagoo ugu baaqay shacabka Puntland “in aan lagu khiyaamin mowqifka dowladda ee hadda jira.”
Waxay ugu baaqeen Golaha Wakiillada Puntland inay si degdeg ah u baabi’iyaan heshiiska, sidoo kalena ku wargeliyeen xubnaha Golaha Qaranka ee Mustaqbalka Soomaaliya inay cadeeyaan mowqifkooda, kadib markii mid ka mid ah xubnahaasi ah ay sheegeen inuu taageeray xaqa Somaliland u leedahay ismaamul gaar ah.
Bayaankoodu ayeey ku soo gabagaboobay, in xisbiyadu ay mar kale xaqiijiyeen inay ka go’an tahay ilaalinta mabaadi’da aasaasiga ah ee Puntland, gaar ahaan midnimada iyo wadajirka Jamhuuriyadda Federaalka Soomaaliya.