Nairobi (Dawan) – Qaramada Midoobay ayaa Jimcihii ku dhawaaqday inay u qoondeysay 60 milyan oo doolar si loo xoojiyo dadaallada lagu xakameynayo faafitaanka cudurka Ebola ee si xawli ah ugu sii fidaya Jamhuuriyadda Dimuqraadiga Congo iyo dalalka deriska la ah.
Deeqdan degdegga ah ayaa lagu sheegay in lagu taageeri doono howlaha caafimaad ee degdegga ah, oo ay ka mid yihiin dabagalka dadka lala xiriiray cudurka, dhismaha xarumaha daaweynta, iyo ololeyaasha wacyigelinta bulshada si loo yareeyo faafitaanka cudurka.
Qaramada Midoobay ayaa sheegtay in lacagta laga bixiyay sanduuqa gurmadka degdegga ah, iyadoo ujeedadu tahay in laga hortago faafitaanka halista ah oo ay ku jiro nooc cusub oo Ebola ah oo loo yaqaan “Bundibugyo”, kaas oo aan weli lahayn tallaal la ansixiyay ama daawo rasmi ah.
Sida ay sheegeen mas’uuliyiinta caafimaadka, xaaladda Congo waxaa sii adkeeyay amni-darro, barakac iyo nidaamka caafimaad oo daciif ah, taasoo caqabad ku noqotay dadaallada xakameynta cudurka.
WHO ayaa horey u shaacisay in cudurkan loo aqoonsaday xaalad caafimaad oo degdeg ah, maadaama uu halis weyn u yahay gobolka iyo caalamka.
