Qatar Charity iyo SODMA oo cunto u qeybinaya kumannaan qoys

Muqdisho (Dawan ) – Hay’adda Qadar Charity iyo Hay’adda Maareynta Musiibooyinka Qaranka Soomaaliyeed (SODMA) ayaa maanta si rasmi ah u daah-furay mashruuc ballaaran oo cunto-qaybin ah, kaas oo lagu caawinayo ilaa 6,000 oo qoys oo danyar ah oo ay saameeyeen abaaraha ba’an ee dalka ka jira, gaar ahaan bulshada nugul ee ku nool Gobolka Banaadir.

Daah-furka mashruucan ayaa ka dhacay xarunta Barbaarinta Agoonta Ciidanka Booliska Soomaaliyeed ee Muqdisho, iyadoo ay goob-joog ka ahaayeen mas’uuliyiin ka socday Qadar Charity, SODMA iyo Safaaradda Dowladda Qadar ee Soomaaliya.

Guddoomiyaha Qadar Charity, Cabdifitaax Aadan Macallin, ayaa sheegay in mashruucan uu si gaar ah u taageerayo dadka Soomaaliyeed ee ay abaaruhu saameeyeen, isagoo xusay in sanadkan gargaar cunto ah la gaarsiin doono ilaa 6,000 oo qoys oo ku nool Gobolka Banaadir.

“Bisha Ramadaan, hay’adda Qadar Charity iyo Safaaradda Qadar waxay sanad walba sameeyaan gurmad lagu gaarsiinayo dadka sooman ee u baahan taageero. Sanadkan, gargaarka wuxuu gaari doonaa ilaa 6,000 oo qoys oo ku nool Gobolka Banaadir iyo meelo kale oo Soomaaliya ah,” ayuu yiri.

Safiirka Dowladda Qadar ee Soomaaliya, Dr. Cabdalla Bin Saalim Al-Nu’aymi, ayaa sheegay in dowladdiisu ay ka go’an tahay sii wadidda taageerada dadka Soomaaliyeed ee ku jira xaaladaha adag, isagoo tilmaamay in mashruucani uu qayb ka yahay dadaallada Qadar ee caawinta dalalka Islaamka.

Guddoomiyaha SODMA, Maxamuud Macallin Cabdulle, ayaa dhankiisa u mahadceliyay Hay’adda Qadar Charity iyo Dowladda Qadar, isagoo xusay in gargaarkan uu muhiim u yahay shacabka Soomaaliyeed ee ay abaaruhu saameeyeen. "Dabcan, ummada Soomaaliyeed xaaladda ka jirta abaaraha xun ayaa gees ka gees bilaabatay. Dowladaha saaxiibada nala ah, walaalahayaga, iyo dowladaha Muslimiinta ah ayaa gurmadka bilaabay, waana idiin iman doonaa meel kasta oo aad joogtaan, ilaa Saylac iyo ilaa Dhoobleey," ayuu yiri, Guddoomiyaha SODMA, isaga oo ballan qaaday in gurmadka la gaarsiin doono dhammaan deegaannada ay dhibaatadu ka jirto, ee guud ahaan dalka.

Mashruucan ayaa ka koobnaan doona qaybinta raashin ay ku jiraan cuntooyin aasaasi ah oo lagama maarmaan u ah qoysaska ay abaaruhu saameeyeen, iyadoo la qorsheynayo in si toos ah loogu gaarsiiyo qoysaska ku nool Gobolka Banaadir.