Ankara 15 December 2025 (Dawan)- Wasiirka Tamarta iyo Kheyraadka Dabiiciga ah ee Turkiga, Alparslan Bayraktar, ayaa shaaca ka qaaday in sanadka 2026 ay qorsheynayaan in ay bilaabaan qodista shidaalka Soomaaliya, xilli uu baarlamaanka dalkiisa horgeynayay miisaaniyadda wasaaradda ee sanadka soo socda.
Wasiirka ayaa caddeeyay in sahanadii lagu ogaanayay shidaalka la dhameystiray, taas oo u gogal xaareysa in laguda galo tallabada xigta ee qodista shidaalka Soomaaliya. “Waxaan dhammaystirnay sahanno seismic oo laga sameeyay biyaha Soomaaliya, waxaana hiigsaneynaa in qodistii ugu horreysay aan ka fulinno sanadka 2026,” ayuu yiri Bayraktar.
Warbixin uu la wadaagay baarlamaanka Turkiga ayaa lagu sheegay in dowladda Turkiga sanadka 2025 ay dhameystirtay 182 qodis dhul ah iyo 17 dhanka badda ah, halka ay hadda socdaan 48 dhul iyo 4 badeed, taasoo keentay in la helo 62 milyan fuusto oo shidaal cusub ah.
