Muqdisho (Dawan)– Wasiirka Arrimaha Dibadda iyo Iskaashiga Caalamiga ah ee Soomaaliya, Cabdisalaan Cabdi Cali, ayaa si cad u sheegay in dowladda federaalka aysan qorshaheeda ku jirin in xal militari lagu wajaho khilaafaadka gudaha dalka, gaar ahaan arrimaha la xiriira qaddiyadda Somaliland oo soo jiitamaysay in ka badan 30 sano.
Wareysi gaar ah oo uu siiyay barnaamijka Miizaan Podcast ee ka baxa Dawan Media, ayuu wasiirku ku sheegay in miiska dowladda mar walba saaran yahay wada-xaajood iyo hannaanka lagu gaari karo isu-soo dhowaansho siyaasadeed, halka aanay jirin wax dhiirrigelin ah oo ku saabsan in xoog la isku adeegsado markuu uu jiro khilaaf u dhexeeya bulshada Soomaaliyeed.
“Mar walba miiska waxaa noo saaran wadahadal iyo xal nabadeed. Dowladda ahaan ma dhiirrigelinayno in Soomaali dhexdeeda xoog la isku adeegsado" ayuu yiri wasiirku, isaga oo intaas ku daray in xalka siyaasadeed uu yahay waddada ugu macquulsan ee lagu ilaalin karo midnimada iyo xasilloonida dalka.
Wuxuu carrabka ku adkeeyay in dowladda iyo hoggaanka dalka, gaar ahaan Madaxweyne Xasan Sheekh Maxamuud, ay aaminsan yihiin in xal waara lagu gaari karo oo keliya marka ay Soomaalidu si wadajir ah u fariistaan, ugana doodaan arrimaha ay ku kala aragti duwan yihiin, si loo gaaro go’aan qaran oo la wada leeyahay.
