Soomaaliya, 30 Nofeembar 2025 – Mas'uuliyiinta magaalada Carmo ee gobolka Bari ayaa Sabtidii gaarsiiyey qoysaska ka barakacay dagaalka ka socda Buuraleyda Calmiskaad biyo gurmad ah, si looga yareeyo baahida biyo ee ka jirta gudaha deegaanka ee qoysaska barakacay.
Mas'uuliyiinta deegaanka, oo kaashanaya xubno ka tirsan golaha deegaanka iyo taageerayaasha bulshada, ayaa isku dubariday 15 gaari booyadood oo biyo ah si loo geeyo qoysaska reer guuraa ah ee ka soo cararay guryahooda sababo la xiriira dagaalka iyo abaarta socda.
Sida uu sheegay duqa degmada Carmo, qoysaska barakacay ayaa soo galay magaalada iyagoo wajahaya xaalad adag oo ay la kulmeen biyo la’aan. Qaybinta biyaha ayaa qayb ka ah dadaallada gurmadka ee looga jawaabayo baahiyaha bani'aadamnimada ee deg-degga ah.
“Saakay waxaan dhiig-joojin u samaynay dadkaas ka soo barakacay oo ka yimid Calmiskaad. Xoolihii aad u tabaaleesnaa iyo dadkiiba dhulkii la qabsan waayey,” ayuu yiri Maxamed Geelle Siciid, Duqa Degmada Carmo.
