Muqdisho (Dawan)- Ra’iisul Wasaare Ku-xigeenka Jamhuuriyadda Federaalka Soomaaliya, Jibriil Xaaji Cabdirashiid, ayaa beeniyay eedeymo la xiriira baasaboor Kenyan ah oo la sheegay inuu si sharci-darro ah ku helay, kadib markii warar arrintaas ku saabsan ay ku faafeen baraha bulshada.
War-saxaafadeed uu soo saaray, ayuu ku sheegay in eedeymahaasi yihiin kuwo been abuur ah, oo aan sal iyo raad lahayn, isla markaana aysan lahayn wax caddeyn ah. Wuxuu carrabka ku adkeeyay inuusan marnaba ku lug yeelan fal kasta oo wax u dhimaya amniga, madax-bannaanida, xasilloonida ama midnimada dhuleed ee Soomaaliya iyo Kenya.
“Waxaan si buuxda u beeninayaa eedeymaha la xiriira safarkaygii dhowaa ee Jamhuuriyadda Kenya. Waa eedeymo been abuur ah oo aan lahayn wax sal ah ama xaqiiqo lagu taageeri karo,” ayuu ku yiri bayaankiisa.
