Doha (Dawan)- Ra’iisul Wasaaraha Soomaaliya, Xamsa Cabdi Barre, ayaa Axadda Maanta ah kulan rasmi ah kula yeeshay magaalada Doha Ra’iisul Wasaaraha Dowladda Qatar, Sheekh Maxamed bin Cabdiraxmaan Aal Taani, iyadoo kulankaasi uu qayb ka yahay booqashada rasmiga ah ee uu Ra’iisul Wasaaruhu ku joogo dalkaasi.
Sida uu baahiyay Xafiiska Ra'iisul wasaaraha Dhinacyada ayaa ka wada hadlay xoojinta xiriirka istaraatiijiga ah ee u dhexeeya Soomaaliya iyo Qatar, iyagoo sidoo kale is dhaafsaday aragtiyo ku saabsan amniga gobolka, iskaashiga dhaqaale iyo caqabadaha saameeya ganacsiga caalamiga ah.
Xafiiska Ra'iisul wasaaraha ayaa shaaciyay in Sheekh Maxamed bin Cabdiraxmaan Aal Taani uu bogaadiyay horumarka ay Soomaaliya gaartay sanadihii la soo dhaafay, isagoo sheegay in Qatar ay ka go’an tahay sii wadidda taageerada iyo iskaashiga ay la leedahay Soomaaliya.
Kulanka ayaa sidoo kale lagu falanqeeyay arrimo la xiriira nabadda iyo xasilloonida gobolka, iyo sidii labada dal ay uga wada shaqeyn lahaayeen xal u helidda caqabadaha hortaagan isu socodka ganacsiga caalamiga ah.
