Muqdisho (Dawan)— Ra’iisul Wasaaraha Soomaaliya Xamsa Cabdi Barre ayaa faray wasaaradaha iyo hay’adaha federaalka inay xilalka agaasime-waaxeedyada ku buuxiyaan tartan furan oo ku salaysan karti iyo mudnaan. Xamsa ayaa hadal uu jeediyay Khamiistii ku sheegay in wajiga koowaad ee hannaanka cusub uu bilaaban doono Sebtembar 20, isla markaana uu si gaar ah u khuseyn doono agaasime-waaxeedyada hay’adaha dowladda.
Waxa uu Guddiga Qaranka ee Shaqaalaha Rayidka ah faray inuu Xafiiska Ra’iisul Wasaaraha kala shaqeeyo hirgelinta tartanka, iyadoo dhammaan shaqaalaha rayidka ah ee buuxiya shuruudaha la siinayo fursad siman oo ay xilalka ugu tartamaan. Ra’iisul Wasaaruhu wuxuu sheegay in jago kasta oo ka bannaan hay’adaha dowladda lagu buuxin doono tartan waafaqsan sharciyada iyo xeerarka shaqaalaha rayidka ah.
Xamsa ayaa wasiirrada, madaxda hay’adaha iyo mas’uuliyiinta kale faray inay guddiga la shaqeeyaan, kana fogaadaan tallaabo kasta oo wax u dhimi karta madax-bannaanida, hufnaanta iyo caddaaladda tartanka.