Muqdisho (Dawan)- Ra’iisul Wasaaraha Soomaaliya, Xamse Cabdi Barre, ayaa si cad u sheegay in dowladda federaalku aysan wax wada-hadal ah ama heshiis toos ah la gelin Al-Shabaab, isagoo meesha ka saaray wararka iyo eedeymaha muddooyinkii dambe soo baxay ee la xiriirinayay inuu jiro wadahadal ama heshiis u dhexeeya labada dhinac.
Ra’iisul Wasaaraha oo ka hadlayay Miizaan Podcast oo ka baxa Dawan Media, ayaa sheegay in mowqifka dowladda uu yahay in dalka laga xoreeyo Al-Shabaab, balse ay diyaar u tahay inay la hadasho cid kasta oo ka tanaasusho fikirka iyo dagaalka ay ku jirto.
“Annaga wada-hadal lamaanan gelin, kulama jirno. Waxaa naga dhexeeya waa in dalkan laga xoreeyo. Waxaan diyaar u nahay inaan cidii rabta in lala hadlo oo waxaas kasoo baxda aan la hadalno. Weligeen maanan diidin, waan la hadleynaa waana soo dhaweyneynaa,” ayuu yiri Xamse Cabdi Barre.
Ra’iisul Wasaaruhu wuxuu sidoo kale sheegay in dadka ka tirsan Al-Shabaab ay mustaqbalka qayb ka noqon karaan bulshada haddii ay joojiyaan dilalka oo ay aqbalaan dowladda Soomaaliya.
