Rajo iyo Samir guul ku dhammaaday: Safarka Farshaxaniiste 4C

Waxaa qoray Abukar Osman - Reporter

Muqdisho (Dawan) — Farshaxaniistaha Soomaaliyeed Cabdinaasir Cabdiqaadir Maxamed, oo loo yaqaan 4C, ayaa safarkiisa farshaxanimo ka soo bilaabay xaalad ay aad u koobnaayeen agabka iyo fursadaha uu heli karay, balse wuxuu sii watay go’aan adag oo ah inuu wax abuuro oo uu horumariyo hibadiisa.

Safarkiisa, caqabadihii uu soo maray iyo waayo-aragnimadiisa uu ka helay fagaarayaasha caalamiga ah ayuu kaga hadlay Barbaarta Podcast, oo uu daadihiyo isla markaana soo saaro Abukar Osman, ayna baahiso Dawan Media

Ka hor bandhigyada caalamiga ah iyo fursadaha uu maanta helayo, 4C wuxuu ahaa arday ku nool Boosaaso, halkaas oo farshaxanku uu si tartiib ah qayb muhiim ah uga noqday noloshiisa.

Xilliga ardayda kale ay ku mashquulsanaayeen kubbadda cagta iyo ciyaaraha kale, isaga waxaa si gaar ah u soo jiidan jiray farshaxanka. Wuxuu muddo ka dib fahmay in farshaxanku uusan ahayn hiwaayad oo keliya, balse uu yahay qayb ka mid ah shakhsiyaddiisa iyo habka uu dunida u arko.

Farshaxan lagu sameeyo agab xaddidan

Bilowgii safarkiisa farshaxanimo, 4C wuxuu wajahay caqabad weyn oo la xiriirtay helitaanka agabka xirfadeed ee farshaxanka.

Halkii uu ka heli lahaa acrylic, oil iyo agab kale oo ay adeegsadaan farshaxaniistayaasha xirfadlayaasha ahi, wuxuu ku shaqeyn jiray waxyaabaha deegaanka uu ku noolaa laga heli karay

Waxaa ka mid ahaa Tubeeti iyo Ismaalto, oo ah noocyo rinji ah oo caadi ahaan loo isticmaalo darbiyada iyo guryaha.

4C wuxuu sheegay inuu rinjigaas u adeegsan jiray farshaxankiisa xilli ay adkayd in la helo agab xirfadeed. Wuxuu sidoo kale tijaabin jiray walxo kale si uu rinjiga ugu waafajiyo shaqadiisa farshaxanimo.

Agab la’aantu ma aysan joojin horumarkiisa; balse waxay noqotay qayb ka mid ah waxbarashadiisa iyo waayo-aragnimadiisa farshaxanimo.

Xilligii uu dugsiga dhiganayay, 4C wuxuu ka qayb galay tartan farshaxan oo lagu siiyay watercolor, oo ah agab uusan horay u aqoon sida loo isticmaalo.

Wuxuu tijaabiyay midabbadaas, ugu dambayntiina wuxuu sameeyay mid ka mid ah shaqooyinkii ugu xoogga badnaa tartanka.

Waxa isaga muhiimka u ahaa ma ahayn oo keliya inuu tartanka ku guuleysto. Wuxuu si gaar ah u xiiseynayay agabka la siiyay, wuxuuna doonayay inuu kaydsado rinjiga haray si uu ugu sii tababarto.

Khibraddaasi waxay qayb ka noqotay aragti uu markii dambe ku dhisay xirfaddiisa: hal-abuurku mar walba kuma xirna tayada agabka aad haysato, balse wuxuu ku xiran yahay waxa aad ka abuuri karto waxa aad haysato.

Hooyadii iyo adeerkiis ayaa ka mid ahaa dadka dhiirrigeliyay horumarkiisa farshaxanimo.

Nairobi oo beddeshay aragtidiisa farshaxanka

Caqabadihii la xiriiray agab la’aanta, shaqo la’aanta iyo fursadaha koobnaa ma aysan joojin 4C.

Isbeddel weyn ayaa yimid sanadkii 2022, markii uu Nairobi u aaday degenaansho farshaxan.

Kahor safarka, wuxuu aaminsanaa in qalab casri ah ah uu muhiim u yahay samaynta farshaxan heer sare ah. Balse Nairobi ayaa aragtidaas wax ka beddeshay.

Wuxuu halkaas ku arkay farshaxaniistayaal wax ka sameynaya waxyaabo caadi ah sida warqad, qashin, alwaax iyo walxo kale oo la isku daray. Waxa uu sida gaarka ah ula dhacay waxay ahayd sida waxyaabo aan qiimo badan lahayn loogu beddeli karo shaqooyin hal-abuur leh. Khibraddaasi waxay ballaarisay fahamkiisa ku saabsan hal-abuurka.

4C wuxuu fahmay in hal-abuurku uusan ku xirnayn inaad haysato agabka ugu wanaagsan, istuudiyaha ugu fiican ama xaaladaha ugu habboon, balse uu ku saabsan yahay inaad fursad ka dhex aragto waxa aad haysato. Aragtidaas ayuu Soomaaliya kula soo noqday.

Wuxuu sidoo kale arkay farqi u dhexeeya nidaamka farshaxanka Kenya iyo kan Soomaaliya.

Nairobi, sida uu sheegay, waxaa ka jiray goobo bandhigyo, matxafyo, jaamacado iyo helitaan wanaagsan oo agabka farshaxanka ah, kuwaas oo farshaxaniistayaasha u fududeeya inay xirfaddooda horumariyaan.

Soomaaliya waxay leedahay taariikh dheer oo farshaxan, balse 4C wuxuu aaminsan yahay in dalka weli u baahan yahay xarumo, tababarro, agab iyo fursado badan oo farshaxaniistayaashu ku horumariyaan xirfaddooda.

Nairobi ilaa Venice

Fursadihii xigay ayaa ugu dambayn 4C geeyay fagaaraha caalamiga ah ee farshaxanka. Wuxuu Talyaaniga u safray si uu uga qaybqaato La Biennale di Venezia, oo ka mid ah bandhigyada waaweyn ee farshaxanka casriga ah ee caalamka, laguna qabto magaalada Venice.

Sida uu sheegay 4C, waxay ahayd markii ugu horreysay ee Soomaaliya ay ka qaybqaadato bandhiggaas.

Doorkiisa wuxuu ahaa inuu Soomaaliya ku matalo live painting, isaga oo farshaxanka ku samaynayay goobta iyadoo dadku daawanayaan. 4C wuxuu sheegay in ujeeddadiisu ahayd in dadka ka qaybgalaya bandhigga ay arkaan in uu jiro farshaxaniiste Soomaaliyeed, isla markaana uu awood u leeyahay inuu hibadiisa ku muujiyo fagaaraha caalamiga ah. Wuxuu sheegay in dad badan oo bandhigga joogay ay wareysiyo ka qaadeen.

Maqaallo la xidhiidha

4 saac kahor

Golaha Wasiirrada Koonfur Galbeed oo Laftagareen u aqoonsaday Argagixiso

4 saac kahor

Ra’iisul Wasaare Xamsa iyo dhiggiisa Qatar oo ka wadahadlay amniga gobolka

Doorashadiisa, sida uu sheegay, waxay ka dhalatay markii la raadinayay farshaxaniiste Soomaaliyeed oo leh khibradda iyo awoodda uu dalka ugu matali karo heer caalami ah. Wuxuu sheegay in xulashadu ku salaysnayd shaqadiisa iyo khibraddiisa, ayna ahayn xiriir shakhsi ah.

Farshaxaniiste ku soo bilaabay agab xaddidan oo Boosaaso ah, Venice waxay u ahayd tallaabo weyn oo uu uga gudbay heerkii uu horay u joogay.

Farshaxanka oo lagu gudbinaya sheeko Soomaaliyeed

Khibraddii Talyaaniga waxay sidoo kale beddeshay fahamka 4C ee xiriirka ka dhexeeya farshaxanka iyo sheekada. Wuxuu sheegay inuu bartay in macnaha ka dambeeya farshaxanku uu muhiim u yahay sida xirfadda farsamo ee lagu sameeyay. Bandhigga wuxuu kula kulmay farshaxaniistayaal ka kala yimid Maraykanka, Britain, Talyaaniga, Faransiiska, Nigeria, Ghana iyo Kenya.

Wuxuu arkay habab kala duwan oo farshaxanka casriga ah loo sameeyo, oo ay ku jiraan shaqooyin isku daraya tignoolajiyada, dhaqanka iyo sheekooyinka. 4C, matalaadda Soomaaliya waxay sidoo kale ahayd fursad uu ku gudbiyo dhaqanka Soomaaliyeed. Wuxuu doonayay in shaqadiisu ka sheekeyso Soomaaliya, taariikhdeeda iyo dhaqankeeda, isaga oo ka gudbaya sheekooyinka caadiga ah ee dalka dibaddiisa looga yaqaan.

Khibraddaasi waxay sii xoojisay aaminsanaantiisa ah in xirfad wanaagsan ay farshaxaniiste u horseedi karto meel kasta oo dunida ah. Wuxuu gaaray Yurub, wuxuuna doortay inuu soo laabto

Mid ka mid ah qaybaha ugu xiisaha badan safarka 4C waa wixii dhacay markii uu Yurub gaaray. Inkasta oo uu Talyaaniga tagay, oo ah meel ay dhalinyaro badan oo Soomaaliyeed u arkaan mid ka mid ah meelaha loo tahriibo, haddana wuxuu doortay inuu Soomaaliya ku soo laabto. Wuxuu sheegay in dad badan ay weydiiyeen sababta uu u soo laabtay kaddib markii uu gaaray Yurub. Jawaabtiisu waxay ahayd inuu weli ku qanacsan yahay dalkiisa, inkasta oo uu og yahay caqabadaha jira.

4C wuxuu qiray in Soomaaliya ay ka jiraan shaqo la’aan, dhaqaale yari iyo fursado kooban. Balse ma aaminsana in caqabadahaasi ay ka dhigan yihiin in dalka uusan mustaqbal lahayn. Taa beddelkeeda, wuxuu aaminsan yahay in dadka ay fursado ka abuuri karaan caqabadahaas. Halkii uu xirfaddiisa oo dhan dibadda uga dhisi lahaa, wuxuu doonayay inuu Soomaaliya joogo, isla markaana farshaxankiisa uga sheekeeyo dalka isaga oo gudaha jooga. Wuxuu go’aankiisa ku tilmaamay qayb ka mid ah rabitaanka uu u qabo inuu Soomaaliya ka dhiso dhaxal, bulsho iyo mustaqbal. Wuxuu sidoo kale sheegay inuusan waligiis si dhab ah uga fikirin tahriib.

Halkii uu ka fikiri lahaa tahriib, wuxuu raadinayay waddooyin sharci ah oo uu dunida ku tago, sida degenaanshaha farshaxanka, casuumaadaha, ururrada iyo xiriirrada xirfadeed. Himiladiisu, sida uu sheegay, ma ahayn oo keliya inuu dibadda tago; waxay ahayd inuu xirfaddiisa gaarsiiyo heer ay dunidu iyadu u baahato hibadiisa.

Farshaxanka oo loo beddelayo xirfad

Dhisidda xirfad farshaxanimo waxay sidoo kale ka dhigan tahay in lala tacaalo fahamka bulshada Soomaaliyeed ee farshaxanka. 4C wuxuu aaminsan yahay in farshaxanku noqon karo shaqo dhab ah, balse wuxuu sheegay in dhalinyaro badan aysan weli sidaas u arkin. Caqabadaha jira waxaa ka mid ah helitaanka agab xirfadeed, tababar iyo fursado. Haddana, xirfaddiisa ayaa tusaale u ah in farshaxanku noqon karo il nololeed.

Wuxuu shaqadiisa u kala saaraa laba qaybood oo waaweyn: commissioned work, oo ah shaqo uu macmiilku ka dalbado farshaxaniistaha inuu wax gaar ah u sameeyo, iyo body of work, oo ah shaqo uu farshaxaniistuhu ka abuuro sheekooyin, dhacdooyin, su’aalo bulsho iyo fikrado isaga u gaar ah.

4C wuxuu aaminsan yahay in shaqada shakhsiga ahi ay muhiim u tahay in farshaxaniistuhu gudbiyo wax ka baxsan waxa macmiilku dalbaday. Farshaxanku wuxuu kusoo bandhigi karaa karaa sheeko, su’aal ayuu keeni karaa ama wuxuu ka jawaabi karaa arrin bulshada saameyneysa.

Halgankii ilaa aqoonsiga

Aqoonsigu si degdeg ah uma imaan. Sanadkii 2021, xilli uu marayay xaalad adag oo shaqo la’aan ah, 4C wuxuu sheegay inuu haystay lacag aad u yar. Maalin ka mid ah maalmahaas, wuxuu guriga ka baxay isagoo haysta hal dollar oo uu doonayay inuu ku qadeeyo. Wuxuu ku leexday masjid ku yaalla Xamar Weyne, halkaas oo uu kula kulmay qof u baahnaa caawimaad. Wuxuu siiyay lacagtii uu watay. Kadib, wuxuu ku laabtay shaqadiisa isaga oo aan qadeyn. Halka dollar ee uu watayna wuxuu u bixiyay sadaqo.

Saacado kaddib, waxaa u yimid dad u baahnaa in laga caawiyo cusboonaysiinta saxiix duugoobay.

Halkaas ayuu ka helay $300, taas oo noqotay lacagtii ugu horreysay ee uu farshaxankiisa ku kasbado.

Macnaha dhacdadani kuma koobnayn lacagta uu helay oo keliya. Waxay sii xoojisay aaminsanaantiisa ah in qofka kale la caawiyo iyadoo aan waxba laga filayn. Abaalmarintiisii ugu horreysay ee weynayd wuxuu helay sanadkii 2022, kaddib markii uu Nairobi ka soo laabtay.

Waxaa lagu aqoonsaday barnaamij la xiriiray Himilooyinka Horumarka Waara (Sustainable Development Goals), kaddib markii uu sameeyay farshaxan diiradda saaraya dhalinyaro ka shaqaynaysa nadaafadda iyo hagaajinta deegaanka. Aqoonsigaasi wuxuu u noqday 4C waqti muhiim ah, isaga oo u muujiyay in shaqadiisu saameyn ku yeelan karto meel ka baxsan goobihii uu ku soo barbaaray.

Dhismaha mustaqbalka farshaxanka Soomaaliya

Aqoonsiga caalamiga ahi ma uusan beddelin rabitaanka 4C ee ah inuu Soomaaliya ka shaqeeyo.

Taa beddelkeeda, khibradihiisa dibadda waxay sii xoojiyeen aaminsanaantiisa ah in dalka uu u baahan yahay nidaam farshaxan oo xooggan. Wuxuu ka hadlay baahida loo qabo goobo ay dhalinyaradu si rasmi ah ugu bartaan farshaxanka, kuna horumariyaan xirfadahooda. Khibraddii uu ka helay Nairobi iyo Talyaaniga waxay siisay faham ku saabsan waxa suurtagal noqon kara marka farshaxaniistayaashu helaan tababar, agab, xiriirro iyo fagaarayaal xirfadeed. Wuxuu doonayaa in fursadahaas qaarkood laga helo Soomaaliya.

4C wuxuu aaminsan yahay in caqabadaha Soomaaliya ay yihiin kuwo dhab ah, oo ay ka mid yihiin aqoon, agab iyo fursado la’aan. Balse ma u arko caqabadahaas inay la micno yihiin in rajadu dhimatay.

Wuxuu aaminsan yahay in dhalinyarada, oo ay ku jiraan farshaxaniistayaashu, ay fursado cusub ka abuuri karaan meelaha aysan weli ka jirin.

Rajo iyo Samir Guul ku Dhammaaday

Sheekada 4C waxaa lagu soo koobi karaa safar ka soo bilaabmay rajo, kuna dhammaaday fagaarayaal ka mid ah kuwa ugu waaweyn ee farshaxanka caalamka. Wuxuu Boosaaso ku bilaabay helitaan kooban oo agabka farshaxanka ah, mararka qaarna wuxuu adeegsan jiray Tubeeti iyo waxyaabihii kale ee uu heli karay. Wuxuu Nairobi u safray, halkaas oo fahamkiisa hal-abuurku uu ku ballaartay. Kadib wuxuu Venice uga qaybgalay bandhig caalami ah, isaga oo Soomaaliya ku matalaya live painting. Haddana aqoonsiga caalamiga ahi kama uusan dhaadhicin inuu Soomaaliya ka tago. Taa beddelkeeda, wuxuu sii xoojiyay rabitaankiisa ah inuu dalkiisa wax ka dhiso.

Sheekadiisu sidaas darteed kuma koobna oo keliya koritaanka hal farshaxaniiste. Waxay sidoo kale ku saabsan tahay fursadaha farshaxanka Soomaaliyeed, xilli dhalinyarada hal-abuurka leh ay weli la tacaalayaan agab yari, tababar la’aan iyo fursado xirfadeed oo kooban. 4C, hadafku uma aha oo keliya inuu farshaxan sameeyo. Waa inuu horumariyo xirfadaha, bulshada iyo fursadaha u saamaxaya farshaxaniistayaasha Soomaaliyeed inay sheekooyinkooda iyagu sheegaan, isla markaana sheekooyinkaas gaarsiiyaan dunida.