Sababta ka dambeysay baaqashadii booqashada Wasiirka Arrimaha Dibadda Shiinaha ee Soomaaliya

Muqdisho, 9 Janaayo 2026 (Dawan) — Dowladda Shiinaha ayaa shaaca ka qaadday sababta ka dambeysay dib u dhaca ku yimid booqashadii la qorsheeyay ee Wasiirka Arrimaha Dibadda Wang Yi uu ku iman lahaa Soomaaliya, taas oo ku beegnayd 9-ka Janaayo, iyadoo sababta ku sheegtay isbeddel ku yimid jadwalkiisa rasmiga ah iyo wadatashi diblomaasiyadeed oo labada dhinac dhex maray.

Qoraal Jimcihii ka soo baxay afhayeenka Safaaradda Shiinaha ee Soomaaliya, ayay Beijing ku sheegtay in go’aanka dib loogu dhigay booqashada uu ka dhashay “wadahadallo saaxiibtinimo” oo dhexmaray wasaaradaha arrimaha dibadda ee Shiinaha iyo Soomaaliya, kuwaas oo lagu eegayay isku-duwidda jadwalka iyo hab-raaca booqashada.

“Sababo la xiriira isbeddel ku yimid jadwalka iyo natiijada ka dhalatay wadahadallo saaxiibtinimo oo u dhexeeya wasaaradaha arrimaha dibadda ee labada dal, dhinaca Shiinaha ayaa saameyn ku yeelatay jadwalka booqashada,” ayaa lagu yiri bayaanka, iyadoo aan la shaacin waqti cusub oo booqashadu dhici doonto.

Safaaradda Shiinaha ayaa hoosta ka xariiqday in Beijing ay weli muhiimad weyn siinayso xiriirka iyo iskaashiga istaraatiijiyadeed ee ay la leedahay Soomaaliya, isla markaana ay sii adkaynayso mowqifkeeda siyaasadeed ee ku aaddan taageerada midnimada iyo wadajirka dhuleed ee dalka.

Afhayeenka ayaa sidoo kale sheegay in Shiinuhu uu si buuxda u taageerayo dadaallada dowladda Soomaaliya ay ku ilaalinayso madax-bannaanideeda, midnimadeeda iyo wadajirka dhulkeeda, isla markaana uu diyaar u yahay inuu la shaqeeyo Muqdisho si loo sii xoojiyo iskaashiga laba-geesoodka ah ee dhinacyada kala duwan.

Hadalkan ayaa imaanaya xilli Geeska Afrika ay ka socdaan dhaqdhaqaaqyo diblomaasiyadeed oo xooggan, isla markaana ay sare u kacday xiisaha caalamiga ah ee la xiriira xaaladda siyaasadeed ee Soomaaliya iyo doorkeeda istaraatiijiyadeed ee gobolka.